Միացյալ Նահանգները փրկարարական խմբեր և մարդասիրական օգնություն է ուղարկել Կարիբյան ավազանի երկրներ, որոնք տուժել են «Մելիսա» փոթորկից, հայտարարել է ԱՄՆ պետքարտուղար Մարկո Ռուբիոն։
«Միացյալ Նահանգները սերտ կապի մեջ է Ճամայկայի, Հայիթիի, Դոմինիկյան Հանրապետության և Բահամյան կղզիների կառավարությունների հետ, քանի որ նրանք պայքարում են «Մելիսա» փոթորկի ավերիչ հետևանքների դեմ։ Մեր փրկարարական խմբերը ուղևորվում են տուժած տարածքներ՝ կենսականորեն անհրաժեշտ պարագաներով», - գրել է Ռուբիոն իր X էջում։
Պետդեպարտամենտը հայտարարության մեջ նշել է, որ ԱՄՆ նախագահ Դոնալդ Թրամփի հանձնարարությամբ Ռուբիոն ստեղծել է աղետների արձագանքման հատուկ խումբ, որի միջոցով ԱՄՆ-ն համակարգում է իր ջանքերը տեղական արտակարգ ծառայությունների հետ՝ անհրաժեշտ աջակցության միջոցառումների շրջանակը որոշելու համար։
Միացյալ Նահանգները մարդասիրական օգնության հետ մեկտեղ սնունդ, խմելու ջուր և առաջին անհրաժեշտության ապրանքներ է ուղարկում։
