Ճապոնիան և Միացյալ Նահանգները, որպես իրենց պաշտպանական դաշինքի մաս, մտադիր են հետևողականորեն ամրապնդել իրենց ներկայությունը տարածաշրջանում և ինտենսիվացնել համատեղ զորավարժությունները։ Այս մասին հայտարարել է Ճապոնիայի նոր պաշտպանության նախարար Շինջիրո Կոիզումին իր ամերիկացի գործընկեր Փիթ Հեգսեթի հետ Տոկիոյում կայացած բանակցություններից հետո։
«Աշխարհի ամենամեծ դաշինքը՝ Ճապոնիա-ԱՄՆ դաշինքը, ամրապնդելու համար առաջին բանը, որ մենք պետք է անենք, համատեղ հրամանատարական կառուցվածքի կատարելագործումն է, մեր համատեղ ներկայության ամրապնդումը [Հնդկա-խաղաղօվկիանոսյան տարածաշրջանում] և մեր զորավարժությունների ինտենսիվացումը», - նշել է նա։
Կոիզումին ընդգծել է, որ այս բոլորը Ճապոնիա-ԱՄՆ դաշինքի առաջնահերթ խնդիրներն են, որոնք Ճապոնիայի ինքնապաշտպանության ուժերը և ԱՄՆ զինված ուժերը կիրականացնեն միասին։
Ճապոնիայի պաշտպանության նախարարության նոր ղեկավարը նշել է, որ ինքը և Հեգսեթը նաև համաձայնության են եկել ակտիվացնել պաշտպանական համագործակցությունը, ներառյալ տվյալների փոխանակումը դաշնակից երկրների հետ, ինչպիսիք են Հարավային Կորեան, Ավստրալիան և Ֆիլիպինները։
