Չեռնոգորիայի իշխանությունները հոկտեմբերի 27-ին արագացված կարգով չեղարկում են Թուրքիայի քաղաքացիների համար սահմանված առանց վիզայի ռեժիմը։ Պատճառը Պոդգորիցայում տեղացի բնակչի դանակահարությունն է, որի առնչությամբ ձերբակալվել է Թուրքիայի և Ադրբեջանի երկու քաղաքացի: Միջադեպից հետո դեպքի վայրում հավաքվել է մի քանի հարյուր մարդ, որոնք միգրանտների դեմ ուղղված կարգախոսներ են հնչեցրել, հրահրել են թուրքերին պատկանող գույքի դեմ ուղղված պատասխան հարձակումներ և զանգվածային վանդալիզմի գործողություններ։ Ավելի ուշ իրավապահ մարմիններն այլ իրավախախտումների համար ձերբակալել են Թուրքիայի և Ադրբեջանի ևս 45 քաղաքացու:
Չեռնոգորիայի վարչապետ Միլոյկո Սպայիչը հայտարարել է, որ տնտեսական ակտիվությունը և երկկողմ լավ հարաբերությունները պահպանելու նպատակով առաջիկայում Թուրքիայի հետ ինտենսիվ բանակցություններ կսկսվեն՝ գտնելու օպտիմալ տարբերակ, որը կլինի փոխշահավետ ու համագործակցության և դաշնակցային ոգուն համահունչ: Առայժմ որոշվել է ժամանակավորապես դադարեցնել Թուրքիայի քաղաքացիների համար առանց վիզայի մուտքը Չեռնոգորիա: Ներկայումս Թուրքիայի քաղաքացիներն այդ երկրում առանց վիզայի կարող են մնալ մինչև 90 օր։
Վերջին տարիներին Չեռնոգորիայում թուրքական ներկայությունը զգալիորեն աճել է։ Երկրի վիճակագրական ծառայության տվյալներով՝ Չեռնոգորիայում բնակվում է Թուրքիայի ավելի քան 13000 քաղաքացի, իսկ թուրք ձեռնարկատերերին է պատկանում մոտավորապես 6900 գրանցված ընկերություն՝ բոլոր օտարերկրյա ձեռնարկությունների գրեթե 28%-ը։
