Եվրոպական հանձնաժողովը (ԵՀ) կարող է առաջարկել, որ ԵՄ երկրները տասնյակ միլիարդավոր եվրոյի համատեղ վարկ վերցնեն Ուկրաինային օգնելու համար, եթե համայնքը չկարողանա համաձայնության գալ Կիևի համար այսպես կոչված «փոխհատուցման վարկի» հարցի շուրջ՝ օգտագործելով Եվրոպայում սառեցված ռուսական ինքնիշխան ակտիվները։
Այս մասին հաղորդում է եվրոպական Politico հրատարակությունը՝ հղում անելով եվրոպացի դիվանագետներին։
Նրանց խոսքով՝ ակնկալվում է, որ Եվրահանձնաժողովը առաջիկա շաբաթներին կներկայացնի փաստաթուղթ, որը կներառի ռուսական ակտիվների բռնագրավման նոր առաջարկ, ինչպես նաև ԵՄ երկրների կողմից պարտքային պարտավորությունները համատեղ ստանձնելու գաղափարը։
Փաստաթղթում կարող է նաև ուրվագծվել երրորդ տարբերակը՝ հրաժարվել Ուկրաինային հետագա ֆինանսական աջակցությունից, սակայն դիվանագետները նշել են, որ միայն Հունգարիան կարող է համաձայնվել դրան։
Politico-ի աղբյուրները ընդգծել են, որ պարտքի ավելացման հեռանկարը չի գոհացնի ԵՄ երկրների մեծ մասին, որոնք դեռևս «փոխհատուցման վարկը» համարում են Կիևի ֆինանսավորման լավագույն մեխանիզմը։
Նշվում է, որ Եվրահանձնաժողովը կարող է առաջարկել այս տարբերակը՝ համայնքի երկրներին «վախեցնելու» և նրանց գործողություններ ձեռնարկելու խրախուսելու համար։
