Կոլումբիայի նախագահ Գուստավո Պետրոն ԱՄՆ կառավարության կողմից իր և իր ընտանիքի անդամների նկատմամբ կիրառված պատժամիջոցները պարադոքսալ է անվանել՝ հաշվի առնելով Բոգոտայի պայքարը թմրանյութերի ապօրինի շրջանառության դեմ։
«Ի պատասխան թմրանյութերի ապօրինի շրջանառության դեմ տասնամյակներ շարունակ իմ արդյունավետ պայքարի, ես սա ստացա այն հասարակության կառավարությունից, որին մենք այդքան օգնել էինք կոկաինի օգտագործումը զսպելու հարցում: Սա լրիվ պարադոքս է, բայց ոչ նահանջ, ոչ ծնկի գալ», - գրել է նա X-ում:
Պետրոյի խոսքով՝ Միացյալ Նահանգներում իր շահերը կներկայացնի փաստաբան Դանիել Կովալիկը։
Ավելի վաղ ԱՄՆ ֆինանսների նախարարության արտասահմանյան ակտիվների վերահսկողության գրասենյակը հայտարարել էր, որ ԱՄՆ վարչակազմը որոշել է պատժամիջոցներ կիրառել Պետրոյի, նրա կնոջ և որդու նկատմամբ։ Ցուցակում ներառված էր նաև Հանրապետության ներքին գործերի նախարար Արմանդո Բենեդետին։
