Ադրբեջանի նախագահի աշխատակազմի նախկին ղեկավար և Անվտանգության խորհրդի անդամ Ռամիզ Մեհդիևը ծրագրել էր պետական հեղաշրջում իրականացնել Ադրբեջանում, հաղորդում է APA պետական լրատվական գործակալությունը։
Ըստ աղբյուրի՝ ռուսական կողմը այս ծրագիրը բացահայտել է նախագահներ Վլադիմիր Պուտինի և Իլհամ Ալիևի՝ Դուշանբեում կայացած հանդիպման ժամանակ։
Մեհդիևն առաջարկել է իշխանությունը բռնի զավթելուց հետո ստեղծել ժամանակավոր մարմին, որի գլխին պետք է կանգնած լիներ ինքը՝ 87-ամյա նախկին պաշտոնյան։ Այդ խորհրդի ենթադրյալ անդամների մասին տեղեկությունը Մեհդիևը փոխանցել է նաև ռուսական կողմին։
Դուշանբեում բանակցությունների ժամանակ Մոսկվան, ըստ APA-ի, Բաքվին տեղեկացրել է Մեհդիևի ծրագրերի և նրա ցանցի գործունեության մասին՝ փաստացի հրաժարվելով նրան աջակցելուց և պաշտոնապես տեղեկացնելով Ադրբեջանի իշխանություններին։
Մեհդիևին մեղադրանք է առաջադրվել 278.1 (իշխանության զավթման փորձ), 274 (պետական դավաճանություն) և 193-1.3.2 (փողերի լվացում) հոդվածներով։ Դատարանը նրան դատապարտել է չորս ամսվա տնային կալանքի։
Նախկին պաշտոնյան կարող է նաև զրկվել իր պետական պարգևներից և պատվավոր կոչումներից։
Հրապարակվել են նաև Ռամիզ Մեհդիևի աջակիցների անունները, որոնք, ըստ լրատվամիջոցների տեղեկությունների, Մոսկվայի աջակցությամբ Ադրբեջանում հեղաշրջում էին ծրագրել.
▪️Նախկին արտգործնախարար Էլմար Մամեդյարով
▪️Նախագահի աշխատակազմի նախկին բաժնի ղեկավար Ալի Հասանով
▪️Մշակույթի նախկին նախարար Աբուլֆաս Գարաև
▪️Ազեր Քասիմով
▪️Ազգային անվտանգության նախկին նախարար Էլդար Մախմուդովը և նրա փեսան՝ Ջահանգիր Հաջիևը
▪️Տրանսպորտի նախկին նախարար Զիյա Մամեդով
▪️Նախկին պատգամավոր Էլտոն Մամեդով
▪️Քամալ Ալիևը, որը հեռացվել է դատական համակարգից «Տերտերի գործի» հետ կապված
▪️և այլք։
