Կանադայի վարչապետ Մարկ Քարնին և ԱՄՆ նախագահ Դոնալդ Թրամփը հանձնարարել են իրենց օգնականներին արագորեն կնքել երկու երկրների միջև բոլոր անհրաժեշտ առևտրային համաձայնագրերը, հաղորդում է National Post-ը՝ հղում անելով կանադական պատվիրակության անանուն անդամին, որը մասնակցել է առաջնորդների բանակցություններին Վաշինգտոնում հոկտեմբերի 7-ին։
Նրա խոսքով՝ Թրամփը և Քարնին հանձնարարել են իրենց բանակցային թիմերին «արագորեն կնքել անհրաժեշտ առևտրային համաձայնագրերը»։ Մասնավորապես, Կանադայի միջգերատեսչական հարաբերությունների նախարար և Միացյալ Նահանգների հետ առևտրի պատասխանատու անձ Դոմինիկ ԼեԲլանկը Քարնիի մեկնումից հետո մի քանի օր կմնա Վաշինգտոնում։
Բանակցություններից հետո Թրամփը հստակ պատասխան չտվեց բազմիցս հնչող հարցերին այն մասին, թե հնարավո՞ր է լուծել Վաշինգտոնի և Օտտավայի միջև առկա սուր առևտրային վեճերը, հասնել այս հարցի շուրջ նոր համաձայնության և նվազեցնել ներմուծման վրա ամերիկյան մաքսային տուրքերի դրույքաչափերը, սակայն նա գովաբանել է Քարնիի աշխատանքը՝ նրան անվանելով «շատ լավ առաջնորդ»։
Այն բանից հետո, երբ Օտտավան և Վաշինգտոնը չկարողացան մինչև օգոստոսի 1-ը առևտրային համաձայնագրի հասնել, Թրամփը գործադիր հրամանագիր ստորագրեց՝ Կանադա-Մեքսիկա-ԱՄՆ ազատ առևտրի համաձայնագրով չընդգրկված մի շարք ապրանքների մաքսատուրքերը 25%-ից բարձրացնելով մինչև 35%։
