ԱՄՆ նախագահ Դոնալդ Թրամփը կարող է հանդիպել Հյուսիսային Կորեայի առաջնորդ Կիմ Չեն Ընի և Հնդկաստանի վարչապետ Նարենդրա Մոդիի հետ իր ասիական շրջագայության ընթացքում, հաղորդում է Nikkei Asia-ն։Հրատարակությունը նշում է, որ ԱՄՆ-ի և Հնդկաստանի առաջնորդների միջև հանդիպումը, որոնց հարաբերությունները սրվել են Թրամփի կողմից Հնդկաստանին ռուսական նավթի ներմուծումը դադարեցնելու կոչերի պատճառով, կարող է տեղի ունենալ Մալայզիայի մայրաքաղաք Կուալա Լումպուրում, որտեղ հոկտեմբերի 26-28-ը կկայանա Հարավարևելյան Ասիայի երկրների ասոցիացիայի (ԱՍԵԱՆ) գագաթնաժողովը։
Այնուհետև Թրամփը կմեկնի Կորեայի Հանրապետություն, որտեղ տեղի կունենա Ասիա-խաղաղօվկիանոսյան տնտեսական համագործակցության (APEC) գագաթնաժողովը: Պորտալի տվյալներով՝ Կորեայի Հանրապետություն այցի ընթացքում ամերիկացի առաջնորդը կարող է այցելել Հյուսիսային և Հարավային Կորեաների միջև գտնվող ապառազմականացված գոտի:
Պորտալը գրում է, որ այնտեղ հնարավոր է հանդիպում Կիմ Չեն Ընի հետ:Ավելի վաղ հարավկորեացի պաշտոնյան չէր բացառել Թրամփի և Կիմ Չեն Ընի հանդիպման հնարավորությունը Հարավային Կորեայի Կյոնջու քաղաքում կայանալիք Ասիա-խաղաղօվկիանոսյան տնտեսական համագործակցության (APEC) գագաթնաժողովի ժամանակ։Մոդին, իր հերթին, նախկինում հայտարարել էր, որ անհամբեր սպասում է Թրամփի հետ հանդիպմանը։
