ԵՄ առաջնորդները Կոպենհագենում կայանալիք ոչ պաշտոնական գագաթնաժողովում կքննարկեն Իսրայելի դեմ հնարավոր պատժամիջոցները, հայտնում է Politico եվրոպական հրատարակությունը՝ հղում անելով բարձրաստիճան դիվանագետի։
Նրա խոսքով՝ եվրոպացի առաջնորդները կհանդիպեն առանց իրենց խորհրդականների և պաշտոնական արարողակարգի պատասխանատուների, ինչը նշանակում է, որ նրանք կկարողանան քննարկել այն հարցերը, որոնց վերաբերյալ կարծիքները տարբերվում են։
ԵՄ առաջնորդների համատեղ հայտարարություն նույնպես չի սպասվում ոչ պաշտոնական գագաթնաժողովից հետո: Բարձրաստիճան դիվանագետը Politico-ին ասել է, որ եվրոպացի առաջնորդները կքննարկեն նաև Իսրայելի դեմ հնարավոր պատժամիջոցները, չնայած այդ հարցը պաշտոնական օրակարգում չէ:
ԵՄ պետությունների և կառավարությունների ղեկավարները չորեքշաբթի օրը կհավաքվեն Կոպենհագենում: Հինգշաբթի օրը այնտեղ կկայանա նաև Եվրոպական քաղաքական համայնքի նիստ:
