Եգիպտոսը, Կատարը և Թուրքիան կոչ են արել արմատական պաղեստինյան ՀԱՄԱՍ շարժմանը ընդունել Գազայի հատվածի համար ամերիկյան խաղաղության ծրագիրը, հաղորդում է Axios-ը։Համապատասխան բանակցությունների ընթացքին ծանոթ երկու անանուն աղբյուրների հղումով այն գրում է, որ երկուշաբթի երեկոյան ԱՄՆ նախագահ Դոնալդ Թրամփի կողմից Գազայի վերաբերյալ ներկայացված խաղաղության առաջարկների մանրամասները, Դոհայում ՀԱՄԱՍ-ի առաջնորդներին հանձնել են Կատարի վարչապետ և արտաքին գործերի նախարար Մոհամմեդ բին Աբդուլ Ռահման ալ Թանին և Եգիպտոսի գլխավոր հետախուզության վարչության պետ Հասան Ռաշադը։
Հաղորդագրության մեջ նշվում է, որ երկուսն էլ կոչ են արել ՀԱՄԱՍ-ին համաձայնվել ամերիկյան ծրագրին։ Այնտեղ նշվում է, որ ՀԱՄԱՍ-ի ղեկավարության ներկայացուցիչները խոստացել են «լրջորեն ուսումնասիրել Միացյալ Նահանգների առաջարկները»։
Պորտալի տվյալներով՝ ամերիկացիներն ու իսրայելցիները սպասում են, որ ՀԱՄԱՍ-ը, ընդհանուր առմամբ, կաջակցի այդ ծրագրին, թեև որոշ վերապահումներով։
