Իսրայելցի զինվորականները մտել են Սիրիայի հարավում գտնվող Դարաա նահանգ, հայտնում է սիրիական «Ալ-Իխբարիա» հեռուստաալիքը։ Դրա խոսքով՝ առավոտյան իսրայելցիներին նկատել են Դարաայի արևմտյան մասում գտնվող Աբդին գյուղի ծայրամասում։
Այնուհետև, ըստ հեռուստաալիքի, իսրայելական զորքերը հասել են Էլ-Արեդի տարածք և այնտեղ հսկիչ կետ են տեղադրել։
Նախորդ օրը, ինչպես հաղորդել է «Սիրիա» հեռուստաընկերությունը, իսրայելական բանակի պարեկախումբը ներխուժել է Արաբական Հանրապետության հարավում գտնվող Էլ-Կունեյտրա նահանգ և մաքրման գործողություններ իրականացրել Էլ-Մուալլաքա գյուղում։
Ինչպես նշել է հեռուստաալիքը, վերջերս իսրայելական ուժերը հաճախակի են ներխուժում Սիրիայի տարածք, ձերբակալում տեղի բնակիչներին և խուզարկություններ անցկացնում նրանց տներում։
