Վիետնամի հյուսիսային և կենտրոնական շրջաններում Ֆիլիպիններից եկած «Բուալոյ» թայֆունի պատճառով զոհվել է առնվազն 12 մարդ, ևս 17-ը անհետ կորած են համարվում, հայտնում է VnExpress տեղական լրատվական կայքը։
Լրատվամիջոցի տվյալներով՝ նախնական վիճակագրությունը ցույց է տալիս, որ զոհվել է 12 մարդ, իսկ երեք նավակների վրա գտնվող 17 ձկնորսների հետ կապը կորել է։ Աղբյուրի համաձայն՝ աղետից ամենաշատը տուժել է կենտրոնական Թհան Հոա նահանգը։
Հարյուրավոր տներ մասամբ ավերվել են, իսկ հեռահաղորդակցության աշտարակներն ու էլեկտրահաղորդման գծերը վնասվել են, ինչի հետևանքով տարածաշրջանի զգալի մասը մնացել է առանց էլեկտրաէներգիայի և հեռախոսային կապի։ Փոթորիկը նաև ջարդուփշուր է արել և վնասել տասնյակ մեքենաներ։
Հիդրոօդերևութաբանական կանխատեսումների ազգային կենտրոնը հայտնել է, որ փոթորիկը առատ տեղումներ է առաջացրել Վիետնամի կենտրոնական և հյուսիսային շրջաններում, այդ թվում՝ մայրաքաղաք Հանոյում և մի քանի հյուսիսային նահանգներում։
