ԱՄՆ նախագահ Դոնալդ Թրամփը ակնկալում է, որ Գազայի հատվածում խաղաղության համաձայնագրի մանրամասները կհամաձայնեցվեն Իսրայելի վարչապետ Բենիամին Նեթանյահուի հետ Սպիտակ տանը սեպտեմբերի 29-ին կայանալիք հանդիպման ժամանակ։ Այս մասին ամերիկացի առաջնորդը հայտարարել է Reuters-ին տված հարցազրույցում։
Թրամփը վստահեցրել է, որ «բոլորը ցանկանում են գործարք կնքել»։ Նա հայտնել է, որ Իսրայելից և արաբական պետություններից «շատ լավ արձագանք» է ստացել հնարավոր համաձայնությունների վերաբերյալ։
Ամերիկացի առաջնորդը նախկինում Axios պորտալի լրագրողներին ասել էր, որ Գազայի հատվածում կարգավորման վերաբերյալ խորհրդակցությունները այժմ «իրենց վերջնական փուլում են», ինչը կարող է հնարավորություն տալ Մերձավոր Արևելքում ավելի լայն կարգավորման։
Թրամփը նախկինում Truth Social-ում գրել էր. «Մենք իրական հնարավորություն ունենք Մերձավոր Արևելքում ինչ-որ մեծ բանի հասնելու։ Առաջին անգամ բոլորը նվիրված են ինչ-որ յուրահատուկ բանի։ Մենք կհասնենք դրան»։
