Եվրոպական հանձնաժողովի (ԵՀ) ղեկավար Ուրսուլա ֆոն դեր Լայենը իր քաղաքական կուրսով Եվրամիությունը տանում է դեպի անդունդ և պետք է իր պաշտոնը հանձնի ավելի կոմպետենտ մեկին։ Այս կարծիքն է հայտնել Հունգարիայի վարչապետ Վիկտոր Օրբանը։
«Բոլոր կարևոր հարցերը պետք է վերանայվեն, քանի որ Ուրսուլա ֆոն դեր Լայենի գլխավորությամբ ԵՄ-ն գնում է դեպի անդունդ։Ժամանակն է, որ նա հավաքի իր ճամպրուկները և Բրյուսելը թողնի նրանց, ովքեր կարող են ավելի արդյունավետ քաղաքականություն վարել», - Օրբանի խոսքերը մեջբերել է Հունգարիայի վարչապետի գրասենյակի միջազգային հաղորդակցությունների և կապերի պետական քարտուղար Զոլտան Կովաչը X-ում։
Ավելի վաղ Օրբանը հայտարարել էր, որ սեպտեմբերի 10-ին «Եվրոպայի հայրենասերներ» աջակողմյան պահպանողական խմբակցությունը նախաձեռնել է ֆոն դեր Լեյենի նկատմամբ անվստահության քվեարկություն։
Ավելի վաղ Politico-ն հայտնել էր, որ քաղաքական սպեկտրի տարբեր ծայրերից եկած խմբակցությունները Եվրախորհրդարանում պատրաստում են երկրորդ քվեարկությունը Եվրահանձնաժողովի ղեկավարի նկատմամբ անվստահության քվեարկության վերաբերյալ:
Թերթի տվյալներով՝ դա կարող է տեղի ունենալ հոկտեմբերին: Առաջին փորձը, որը տեղի է ունեցել հուլիսին, անհաջող ավարտվել է:
