ԱՄՆ Ներկայացուցիչների պալատի պատվիրակությունը Չինաստան կայցելի 2019 թվականից ի վեր առաջին անգամ, ուղևորությունը նախատեսված է սեպտեմբերին։ Այս մասին NBC News-ին տված հարցազրույցում հայտարարել է ԱՄՆ կոնգրեսական և ապագա պատվիրակության ղեկավար Ադամ Սմիթը (դեմոկրատ)։
Սմիթը նշել է, որ այցին կմասնակցեն Ներկայացուցիչների պալատի զինված ուժերի հանձնաժողովի անդամներ՝ թե՛ դեմոկրատական, թե՛ հանրապետական կուսակցություններից։
«Իմ գլխավոր ուղերձն այն է, որ մեզ անհրաժեշտ է երկխոսություն և հաղորդակցություն։ Ես խորապես մտահոգված եմ, որ Չինաստանը խոշոր զարգացող տերություն է, որի հետ, կարծես, մենք ավելի ու ավելի քիչ ենք խոսում։
Մենք պետք է գտնենք մեր տարաձայնությունները լուծելու միջոց, և դա անհնար է, եթե մենք չշփվենք միմյանց հետ: Կարծում եմ, որ նման հանդիպումները պետք է հաճախակի լինեն, կանոնավոր կերպով», - հեռուստաալիքին ասել է կոնգրեսականը։
