Բրիտանական թագավորական նավատորմի «Փրինս օֆ Ուելս» ավիակիրը զորավարժություններ է անցկացրել Հարավային Կորեայի Բուսան քաղաքից հարավ գտնվող միջազգային ջրերում, հաղորդում է «Յոնհապ» լրատվական գործակալությունը՝ հղում անելով Սեուլում Մեծ Բրիտանիայի դեսպանատանը։
Զորավարժություններում ներգրավված էին F-35B ինքնաթիռներ: Ավիակիրը կարող է տեղավորել մինչև 24 նման կործանիչ: Զորավարժությունները ներառում էին «ավիացիայի հնարավորությունների ցուցադրություն»:
Սեուլում Մեծ Բրիտանիայի դեսպանը նշել է, որ զորավարժությունները ցույց են տվել Մեծ Բրիտանիայի համագործակցության մակարդակը Կորեայի Հանրապետության հետ և Լոնդոնի պատրաստակամությունը՝ «խորացնելու մեր ռազմավարական գործընկերությունը և նշանակալի ներդրում ունենալու տարածաշրջանի անվտանգության ճարտարապետության մեջ»։
Ավիակիրն ունի մոտ 700 մարդուց բաղկացած անձնակազմ և կարող է տեղավորել մինչև 1600 զինծառայողի։
Բացի այդ, Կորեայի Հանրապետությունը և Միացյալ Թագավորությունը համատեղ վարժանքներ են անցկացրել՝ յուրաքանչյուր կողմից երեքական նավերի մասնակցությամբ։ Նպատակն էր բարելավել երկու երկրների նավատորմերի միջև համաձայնեցվածությունը։
