ԵԱՀԿ գործող նախագահ, Ֆինլանդիայի արտաքին գործերի նախարար Էլինա Վալտոնենը ողջունել է Նախարարների խորհրդի որոշման ընդունումը, որը փակում է Մինսկի գործընթացը և դրան առնչվող կառույցները՝ Հայաստանի և Ադրբեջանի համատեղ դիմումից հետո։
«Եվս մեկ անգամ ցանկանում եմ իմ ջերմագին շնորհավորանքները հղել Հայաստանին և Ադրբեջանին՝ խաղաղության և հարաբերությունների կարգավորման վերաբերյալ պատմական համաձայնությունների և դրանց արագ իրականացումը սկսելու նրանց վճռական որոշման կապակցությամբ։ Ես անմիջապես արձագանքել եմ նրանց համատեղ դիմումին և ցանկանում եմ իմ անկեղծ երախտագիտություն հայտնել կողմերին՝ գործընթացում գերազանց համագործակցության համար։ Ես նաև բարձր եմ գնահատում մասնակից պետություններին այդ համաձայնությանը հասնելու գործում ցուցաբերած աջակցության համար»,- ասել է Վալտոնենը։
Նախարարական խորհրդի որոշումն ընդունվել է ԵԱՀԿ բոլոր 57 մասնակից պետությունների կոնսենսուսի միջոցով։
«ԵԱՀԿ գործող նախագահը և ԵԱՀԿ գլխավոր քարտուղարը վերահաստատել են իրենց անսասան հանձնառությունը՝ աջակցելու այն ջանքերին, որոնց շնորհիվ երկարատև խաղաղությունը և կայունությունը կհաստատվեն Հայաստանում, Ադրբեջանում և ավելի լայն տարածաշրջանում։
Այս որոշման ընդունումից հետո ԵԱՀԿ-ն քայլեր կձեռնարկի Մինսկի գործընթացն ու դրա հետ կապված կառույցները լուծարելու ուղղությամբ: Մինչև գործընթացի ավարտը, ոչ ուշ, քան 2025 թվականի դեկտեմբերի 1-ը, կիրականացվեն միայն վարչական գործառույթներ, ինչպիսիք են ակտիվների և սարքավորումների փոխանցումը»,- նշված է ԵԱՀԿ մամուլի ծառայության հաղորդագրության մեջ:
