Օգոստոսի վերջին կիրակին բնապահպանական օրացույցում նշվում է որպես Սևանա լճի օր՝ ընդգծելով մեր երկրի գլխավոր ու բացառիկ բնական հարստությունը, հայտնում է ՀՀ ՇՄՆ էկոպարեկային ծառայությունից։
Սևանա լիճը ոչ միայն Հայաստանի խոշորագույն քաղցրահամ ջրի պաշարների հիմնական աղբյուրն է, այլև կենսաբազմազանության եզակի միջավայր, որն ապահովում է ջրային էկոհամակարգերի հավասարակշռությունը և խմելու ջրի կարևոր պաշարները։ Նրա մաքրությունը և պահպանությունը համազգային արժեք են, քանի որ լիճը ծառայում է թե՛ մարդու կենսական պահանջմունքներին, թե՛ հարուստ բնաշխարհի շարունակականությանը։
Սևան ազգային պարկի տարածքում իրականացվող պահպանական ու հսկողական միջոցառումները նպատակ ունեն պահպանել լճի ջրային ռեսուրսները, կենդանական և բուսական աշխարհը։ Այս կարևոր գործում առանցքային դերն ունի շրջակա միջավայրի նախարարության էկոպարեկային ծառայությունը, որը համակարգում է այդ ամենն ու նաև կանխարգելիչ աշխատանքները՝ ուղղված լճի բնական հարստությունների պահպանությանը և կայուն օգտագործմանը։
Սևանա լճի օրը ևս մեկ հիշեցում է, որ յուրաքանչյուրիս պարտքն է պահել ու սիրել մեր քաղցրահամ ջրի աղբյուրը՝ որպես Հայաստանի բնապահպանական ապագայի ամուր հիմք։
