Կարտոֆիլի ֆրիի հաճախակի օգտագործումը 20%-ով մեծացնում է 2-րդ տիպի շաքարախտի զարգացման ռիսկը։ Այս եզրակացությանն են հանգել Հարվարդի հանրային առողջապահության դպրոցի հետազոտողները։ Մեծածավալ ուսումնասիրության արդյունքները հրապարակվել են BMJ (British Medical Journal) ամսագրում։
Ուսումնասիրությանը մասնակցել է ավելի քան 205 հազար մարդ։ 30 տարի շարունակ նրանք պարբերաբար լրացրել են հարցաթերթիկներ իրենց սննդակարգի և առողջության վերաբերյալ։ Վերլուծությունը ցույց է տվել, որ շաբաթական երեք կամ ավելի բաժին կարտոֆիլի ֆրի ուտելը 20%-ով մեծացնում է շաքարախտի առաջացման ռիսկը։ Միևնույն ժամանակ, կարտոֆիլի պյուրեն, թխած, եփած կարտոֆիլը նման ազդեցություն չի ունեցել։
Հեղինակները ընդգծում են, որ վտանգը կայանում է արտադրանքի պատրաստման եղանակում՝ խորը տապակումը ուղեկցվում է վնասակար միացությունների առաջացմամբ և ուտեստի գլիկեմիկ բեռի աճով։
Պարզվել է նաև, որ կարտոֆիլի ֆրին ամբողջական հացահատիկային մթերքներով, ինչպիսիք են հացը կամ մակարոնեղենը, փոխարինելը 19%-ով նվազեցնում է շաքարախտի առաջացման ռիսկը։ Այս արդյունքները հաստատվել են մետա-վերլուծությամբ, որը ներառել է կես միլիոնից ավելի մարդկանց տվյալներ։ Գիտնականները պարզել են, որ սննդակարգում նույնիսկ փոքր փոփոխությունները կարող են զգալիորեն բարելավել արյան մեջ շաքարի վերահսկողությունը։
Թարգմանությունը՝ Euromedia24.com-ի
