Գերմանիան մտադիր է ԱՄՆ-ից գնել Typhon գետնային կայանքների արձակման համակարգեր, որոնք նախատեսված են, ի թիվս այլ բաների, մինչև 2000 կմ հեռահարության հրթիռների համար։ Այս մասին հայտարարել է Գերմանիայի պաշտպանության նախարար Բորիս Պիստորիուսը Վաշինգտոն կատարած այցի ժամանակ, հաղորդում է DPA գործակալությունը։
«Պարզ ասած՝ սրանք ցամաքային կայանքներ են, որոնցից կարելի է տարբեր հեռավորություններից արձակել տարբեր թևավոր հրթիռներ», – ասել է նա։ Պիստորիուսը ընդգծել է, որ Գերմանիան, իբր, ցանկանում է Typhon-ն օգտագործել բացառապես պոտենցիալ թշնամուն զսպելու համար։
Նախարարը նշել է, որ նման մարտական համակարգերի հեռահարությունը զգալիորեն ավելի բարձր է, քան եվրոպական երկրների կողմից ներկայումս սպառազինության մեջ գտնվողներինը։
«Այսպիսով, Գերմանիան կարող է զգալիորեն մեծացնել իր պաշտպանական ներուժը, ինչպես նաև իր զսպման հնարավորությունները և Եվրոպայի հնարավորությունները, և սա ունի առանցքային նշանակություն»,-պնդել է Պիստորիուսը։DPA-ն պարզաբանել է, որ Գերմանիան համակարգերի նկատմամբ իր հետաքրքրությունն է հայտնել միայն ԱՄՆ-ին, և Միացյալ Նահանգները ուսումնասիրում է հարցումը։
