Հունգարիան չի ֆինանսավորի Ուկրաինայի համար ամերիկյան զենքի գնումը, եթե Միացյալ Նահանգները պաշտոնապես դիմի Եվրամիությանը նման առաջարկով։ Այս մասին հայտարարել է Հունգարիայի արտաքին գործերի և արտաքին տնտեսական հարաբերությունների նախարար Պետեր Սիյարտոն՝ լրագրողների խնդրանքով մեկնաբանելով Վաշինգտոնի կողմից Կիևին ռազմական օգնության հնարավոր վերսկսման մասին հաղորդագրությունները։
«Ես կցանկանայի ընդգծել, որ հունգարական փողը, հունգարական զենքը և հունգարացի զինվորները չեն ուղարկվի Ուկրաինա։ Այնտեղ ոչինչ չի ուղարկվի», - ասել է արտաքին գործերի նախարարության ղեկավարը Բուդապեշտում Մարոկկոյի արդյունաբերության և առևտրի նախարար Ռիադ Մեզուրի հետ հանդիպումից հետո կայացած մամուլի ասուլիսում։
Միաժամանակ, Սիյարտոն վստահություն է հայտնել, որ ամերիկյան զենքի մատակարարումների հնարավոր վերսկսումը Ուկրաինա չի նշանակում, որ ԱՄՆ նախագահ Դոնալդ Թրամփը հրաժարվել է հակամարտությունը կարգավորելու ջանքերից։
«Ես կարող եմ միայն ասել, որ ոչ ոք այնքան շատ բան չի արել Ուկրաինայում խաղաղության համար, որքան Թրամփը։ Եվ եթե եվրոպացի և ուկրաինացի առաջնորդները վերջին ամիսներին չխոչընդոտեին Դոնալդ Թրամփին, այս խաղաղության ջանքերը կարող էին շատ ավելի հաջող լինել», - նշել է նախարարը։
