Սլովակիայի վարչապետ Ռոբերտ Ֆիցոն հայտարարել է, որ չի հետևի Յուրայ Ցինտուլայի դատավարությանը, ով 2024 թվականի մայիսին իր դեմ մահափորձ էր կատարել։
«Ես հայտարարել եմ, որ որևէ փոխհատուցում չեմ պահանջելու, թեև ես տուժող եմ այս հարցում, բայց, բացառությամբ անխուսափելի գործողությունների, որոնք պետք է արվեն, կարծում եմ, որ դատարանը կցանկանա ինձ հարցաքննել, ես չեմ գնա այնտեղ, չեմ դիտելու, դրա համար պատճառ չեմ տեսնում, քանի որ խնդիրը այս պարոնի մեջ չէ։
Խնդիրն այն է, թե ինչպես են քաղաքական կուսակցություններն ու լրատվամիջոցները ստեղծել ատելության մթնոլորտ, և այդ ատելությունը շարունակվում է այսօր»,- ասել է Ֆիցոն սլովակական Plus JEDEN DEŇ թերթին տված հարցազրույցում, որը հրապարակվել է չորեքշաբթի։
Երեքշաբթի օրը Ֆիցոն ասել է, որ մեծ է հասարակական գործչի վրա հերթական հարձակման հավանականությունը, և այդ կապակցությամբ նա հեռուստաալիքների տնօրեններին և այլ կուսակցությունների ղեկավարներին առաջարկել է դիտարկել կիրակի օրերին քաղաքական քննարկումներից հրաժարվելու հնարավորությունը՝ հասարակության մեջ ագրեսիայի մակարդակը նվազեցնելու համար։
Նրա կարծիքով՝ Սլովակիայի քաղաքացիներին չպետք է անհանգստացնել կիրակի օրերին քաղաքական բանավեճերը, որոնք ներառում են նաև փոխադարձ հարձակումներ և կարծիքների ագրեսիվ փոխանակում։
