Մենք գյուղատնտեսության ապահովագրության համակարգը սկսեցինք ներդնել 2020-ից, մեզ թվում էր, թե մենք ինստիտուցիոնալ կարևոր հարց ենք լուծել և իրականում այդպես էլ կար, բայց շատ արագ ի հայտ եկավ պրոբլեմ: Այս մասին այսօր՝ մարտի 13-ին, կառավարության նիստում հայտարարեց վարչապետ Նիկոլ Փաշինյանը:
«Մեխանիզմը հետևյալն է, որ տեղական ընկերությունները պահովագրական վճարներ են հավաքում տեղի տնտեսվարողներից և իրենք էլ իրենց հերթին ապահովագրություն են գնում օտարերկրյա կազմակերպությունից:Եվ ստացվեց այնպես, որ վերապահովագրող ընկերությունը որոշակի ռիսկեր էր տեսել կամ իր ծախսերի պլանավորած հատվածից չափից ավելի մեծ ծախսեր էր իրականացրել, այդ թվում որոշ անկանոնությունների պատճառով:Ինձ համար գյուղացիների հետ շփումներից շատ տարօրինակ փաստեր ի հայտ եկան, որ իմ մտքով չէր էլ անցնի, որ ոչ բարեխիղճ տնտեսվարողների կողմից որոշակի, չարաշահումներ չասեմ, բայց ինչ-որ ինչ-որ բանաձևեր են գտնվում, որի արդյունքում ստացվում է, որ մեխանիզմ է ձևավորվել, որ ոչ թե հողը մշակել, բերք ստանալն է նպատակը, այլ հողը ապահովագրել, ապահովագրական վճար ստանալն է նպատակը»,- հայտարարեց Փաշինյանը:
Նա խոստովանեց, որ երբ բարի նպատակադրումներով բարեփոխումներ են անում, հետո ստիպված են լինում հետ պտտել այդ բարեփոխումը, որովհետև ստացվում է, որ առնվազն միտումներ կան, որ այդ բարեփոխումը ոչ թե օգտագործվում է զարգանալու համար, այլ այս պահին ինչ-որ մի փոքր և կարճաժամկետ օգուտ ստանալու համար:«Հիմա մենք փորձում ենք գյուղապահովագրության համակարգը Հայաստանում փրկել։ Ինչի՞ ենք ուզում փրկել։
Որովհետև այդ ապահովագրության համակարգի ներդրումը բերել է ինչ-որ անառողջ պրոցեսների։
Պարզվում է, տեղեր կա, մարդիկ գիտեն, որ ամեն տարի այնտեղ կարկուտ է գալիս, գնում ապահովագրում են, գնում են այդտեղ, որ երբեք նախկինում վերջին 20 տարում այդտեղ ոչ մի բան չէինք արել, ինչ-որ բան են ցանում, ու նստած սպասում են, որ կարկուտը գա, որ գնան ապահովագրությունը ստանան:
Ու այդպես ամեն տարի։Սա սոցիալ-հոգեբանական խնդիր է, կրթական խնդիր է, աշխատանքի նկատմամբ վերաբերմունքի խնդիր է, պետության նկատմամբ վերաբերմունքի խնդիր է»,- նկատեց վարչապետը՝ հավելելով, որ եթե մի քանի տարի էլ այսպես շարունակվի, ասելու են՝ վերջ, էլ չենք կարողանում անենք, որովհետև իմաստ չունի, չի ծառայում իր նպատակին։
«Երբ պարոն Պապոյանին նշած սարքավորումները մենք ձեռք բերենք, արդեն մենք էլ կարկուտների թաքուն տեղերը կիմանանք և այդ պարագայում ապահովագրության վճարների չափը կամ կփոխվի, կամ այդտեղ չի ապահովագրվի ընդհանրապես: Կասենք՝ այդտեղ պետք է լինի հակակարկտային ցանց, վերջ:
Կասենք, որ մենք այդտեղ հակակարկտայինը չենք ապահովագրում, մենք սուբսիդավորում ենք, որ այդտեղ հակակարկտային ցանցեր լինեն»,-ասաց նա:
