Չինաստանի նախագահ Սի Ծինփինի և ԱՄՆ նորընտիր նախագահ Դոնալդ Թրամփի հեռախոսազրույցը երանգ է տվել Չինաստանի և ԱՄՆ-ի հարաբերություններին գալիք ժամանակաշրջանի համար՝ աշխարհին բերելով «լավ մեկնարկի» դրական ակնկալիքներ, ասվում է Չինաստանի պետական Global պարբերականի խմբագրականում:
Ուրբաթ օրը Սի Ծինփինը և Դոնալդ Թրամփը հեռախոսազրույց են ունեցել։ Զրույցի ընթացքում Չինաստանի ղեկավարն ասել է, որ Չինաստանն ու ԱՄՆ-ն համագործակցության լայն դաշտ ունեն, երկու երկրները կարող են դառնալ գործընկերներ և բարեկամներ՝ ի շահ միմյանց և աշխարհի։
Նա ընդգծել է, որ երկու ղեկավարներն էլ մեծ նշանակություն են տալիս փոխգործակցությանը և հույս ունեն, որ ԱՄՆ նախագահի նոր ժամկետում երկու երկրների հարաբերությունները լավ սկիզբ կունենան։
«Կրիտիկական պահին, երբ ողջ աշխարհը հետևում է, թե ինչպես են երկու առաջատար երկրները՝ Չինաստանն ու ԱՄՆ-ը, կառուցելու իրենց հարաբերությունները ապագայում, այս հեռախոսազրույցը առանձնահատուկ նշանակություն ունեցավ»,- գրում են հոդվածի հեղինակները։
Հեղինակները նշում են, որ ուղիղ շփումը և կարծիքների փոխանակումը երկու ղեկավարների միջև առանցքային հարցերի շուրջ այսքան վաղ փուլում և ռազմավարական հաղորդակցության ուղիների ստեղծման համաձայնությունը հուշում է, որ երկու կողմերը հույս ունեն հասնել ավելի մեծ առաջընթացի Չինաստան-ԱՄՆ հարաբերություններում նոր մեկնարկային կետից:
