Թուրքիան կաջակցի Սիրիայի նոր իշխանություններին կանոնավոր բանակ ստեղծելու հարցում և նրանց հետ ռազմական համագործակցությունը դիտարկում է որպես հարևան երկրում և ընդհանուր առմամբ տարածաշրջանում խաղաղություն և կայունություն ապահովելու կարևոր հնարավորություն։ Այս մասին հայտնել են Թուրքիայի պաշտպանության նախարարության աղբյուրները՝ մեկնաբանելով սիրիական զինված ուժերի ինքնալուծարման եւ արաբական երկրի նոր պաշտպանության նախարարության կազմում ընդգրկելու մասին որոշումը։
«Մենք աջակցում ենք Սիրիայի նոր ղեկավարության կողմից միասնական բանակ ստեղծելու կոչին և այդ ուղղությամբ աշխատանքին, կարծում ենք, որ Թուրքիայի զինված ուժերի և սիրիական նոր վարչակազմի միջև ռազմական համագործակցությունը կհամապատասխանի երկու երկրների շահերին»,- TRT Haber հեռուստաալիքը մեջբերում է պաշտպանության նախարարության աղբյուրների մեկնաբանությունները։
Ռազմական գերատեսչությունը նաև նշել է, որ Թուրքիայի փորձը, որն ունի «օրինակելի բանակ» և պաշտպանական արդյունաբերության հզոր ենթակառուցվածք, նշանակալի ներդրում կունենա Սիրիայի անվտանգության և պաշտպանունակության ամրապնդման գործում։
Թուրքիայի պաշտպանության նախարարությունը հայտարարել է նաեւ հարեւան երկրի տարածքային ամբողջականության եւ միասնության ապահովման անհրաժեշտության մասին։ «Սիրիայի և մեր տարածաշրջանի ապագայում որևէ ահաբեկչական կազմակերպության տեղ չկա», - ասել են նախարարության աղբյուրները։
