Դամասկոսում իշխանության եկած զինված խմբավորումների առաջնորդ Ահմեդ ալ-Շարաան հրավիրել է Սիրիայի նախկին փոխնախագահ Ֆարուկ ալ-Շարաային՝ մասնակցելու ազգային երկխոսության խորհրդաժողովին։ Այս մասին հայտնում է Al Hadath հեռուստաալիքը, որի կենտրոնակայանը Դուբայում է։
Երկու քաղաքական գործիչները մի քանի անգամ հանդիպել են Սիրիայում անցումային կառավարության իշխանության գալուց հետո։ Նախկին փոխնախագահի եղբոր որդին հեռուստաալիքին հաստատել է, որ 86-ամյա Ֆարուկ ալ-Շարաան ընդունել է հրավերը և մասնակցելու է երկխոսությանը, որի ամսաթիվը դեռևս չի նշվում։
2011 թվականին՝ սիրիական ճգնաժամի բռնկումից հետո, Ֆարուկ ալ-Շարաան բացահայտորեն դեմ արտահայտվեց հակակառավարական ցույցերը բռնությամբ ճնշելուն, որոնք ընդգրկում էին երկիրը: Նա նախաձեռնեց ազգային երկխոսություն՝ նպատակ ունենալով Սիրիայում «ժողովրդավարական բազմակուսակցական համակարգ» հաստատել։
