Բրազիլիայի հարավում գտնվող Ռիո Գրանդե դու Սուլ նահանգի Կանելա օդանավակայանից թռիչքից րոպեներ անց վթարի է ենթարկվել ոչ մեծ մասնավոր ինքնաթիռ։ Նախնական տեղեկություններով՝ ինքնաթիռում կարող էր լինել 10 ուղևոր, ոչ ոք ողջ չի մնացել, ասել է նահանգի նահանգապետ Էդուարդո Լեյտին։
«Ես արդեն այստեղ եմ՝ վթարի վայրում, մենք հետևում ենք փրկարարական գործողությունների զարգացմանը, ըստ երևույթին, ողջ մնացածներ չկան, այժմ բոլոր ջանքերն ուղղված են տարածքը մեկուսացնելուն և տուժած տեղի բնակիչներին փրկելուն»,- ասել է նահանգապետը CNN Brasil-ին։
Ինչպես նշում է G1 պորտալը, ինքնաթիռն ուղևորվելիս է եղել Բրազիլիայի հարավ-արեւելքում գտնվող Սան Պաուլու նահանգ։ Ինքնաթիռն ընկնել է քաղաքային շենքերի վրա, պայթյուն է տեղի ունենեցել, իսկ բլոկի մի հատվածը այրվել է։ Ինքնաթիռը ավերել է կահույքի խանութի և հյուրանոցի շենքերը, վիրավորվել է հյուրանոցի 15 հյուր, որոնց տեղափոխել են հիվանդանոց, պարզաբանում է պորտալը։
Ինքնաթիռը պատկանել է տեղական բիզնեսի մենեջեր Լուիս Կլաուդիո Սալգեյրո Գալեասիին, սակայն դեռ հայտնի չէ՝ արդյոք նա եղել է ուղևորների թվում, ասել է G1-ը։
