Սիրիայում վերջին իրադարձությունները կանխեցին տարածաշրջանային և, հնարավոր է, գլոբալ պատերազմը, քանի որ երկիրն այլևս չի լինի անկայունության օջախ, ինչպիսին էր Բաշար ալ-Ասադի օրոք: Այսպիսի հայտարարություն է արել Սիրիայի նոր իշխանությունների առաջնորդ Ահմեդ ալ-Շարաան Դամասկոսում Լիբանանի Առաջադիմական սոցիալիստական կուսակցության առաջնորդ Վալիդ Ջումբլատի հետ հանդիպմանը։
«Մեր հաջող առճակատումը փրկեց տարածաշրջանը մեծ հակամարտությունից և, հնարավոր է, նոր համաշխարհային պատերազմից», – մեջբերում է սիրիական Al-Watan հրատարակությունը ալ-Շարաայի խոսքերը:
Նրա խոսքով, «նախորդ Սիրիան անկայունության օջախ էր, և այնտեղ իշխող վարչակարգը իրանամետ զինված խմբավորումների հետ միասին ձգտում էր մասնատել սիրիական հասարակությունը»:
Սիրիայի նոր իշխանությունների առաջնորդը նաև մեղադրել է «տապալված ռեժիմին» 1977 թվականին Ջումբլատի հոր՝ Քամալի, 1982 թվականին Լիբանանի նախագահ Բաշիր Ժմայելի և 2005 թվականին Լիբանանի վարչապետ Ռաֆիկ Հարիրիի սպանությունը կազմակերպելու մեջ։
Ալ-Շարաան հույս է հայտնել Լիբանանի հետ ռազմավարական հարաբերություններ կառուցելու հարցում և խոստացել, որ այժմ Սիրիան «կարող է հենարան դառնալ լիբանանցիների համար նոր ուժեղ տնտեսություն կառուցելու գործում» և «կհարգի հարևան պետության ինքնիշխանությունն ու անվտանգությունը»:
