Վրաստանի վարչապետ Իրակլի Կոբախիձեն հակավրացական է որակել Եվրամիության արտաքին գործերի նախարարների կողմից վրացական դիվանագիտական անձնագրեր ունեցողների համար այցագրային ռեժիմ սահմանելու վերաբերյալ ընդունված որոշումը։ Այդ մասին հայտնում է «Ինտերֆաքս» գործակալությունը:
«Այս որոշումը կարելի է գնահատել որպես հակավրացական քայլ, որը խաթարում է վրաց հասարակության մեջ եվրոպական կառույցների նկատմամբ վստահությունը», - ասել է Կոբախիձեն դեկտեմբերի 17-ին կայացած ճեպազրույցում։Նա շնորհակալություն է հայտնել Հունգարիայի, Սլովակիայի, Իտալիայի, Իսպանիայի և Ռումինիայի արտաքին գործերի նախարարներին, որոնք նիստի ժամանակ «պաշտպանել են վրաց ժողովրդի շահերը»։«Մենք հույս ունենք, որ Եվրամիության որոշակի ուժերի կողմից Վրաստանին շանտաժի ենթարկելու գործելակերպը կդադարի», - ասել է Կոբախիձեն։
Նա կարծում է, որ այս «շանտաժի» նպատակը, որն, ըստ նրա, շարունակվում է արդեն երեք տարի, մնում է Եվրոպայում որոշ ուժերի ցանկությունը՝ Վրաստանում իշխանության բերելու արմատական ընդդիմությանը։
«Այսօր, երբ շանտաժի վճռական փուլն ավարտվել է, իսկ մայդանը Վրաստանում ձախողվել է, ես ևս մեկ անգամ Թբիլիսիում ցուցարարներին առաջարկում եմ քննարկում անցկացնել ցանկացած ձևաչափով», - ասել է Կոբախիձեն։
ԵՄ արտաքին հարաբերությունների խորհուրդը դեկտեմբերի 16-ին որոշում է ընդունել դիվանագիտական անձնագիր ունեցող Վրաստանի քաղաքացիների համար վիզային ռեժիմի ներդրման մասին։
