Պետծառայողները վախենում են ալկոհոլային խմիչքներից։ Ուտելիքներ և խմիչքներ մատուցող առևտրային հիմնարկներում, այլ կերպ ասած՝ ռեստորաններում եւ խնջույքի այլ վայրերում պետական պաշտոնյաները սկսել են ներկայանալ իրենց ծոցում պահած ալկոհոլի շշերով, կատեգորիկ մերժում են հատկապես սափորով մատուցվող թորած օղիները։
Euromedia24.COM-ի աղբյուրը, ով պետական համակարգի բազմամյա ծառայող է, յուրահատուկ դրվագներ է պատմել այսօրվա չինովնիկների նոր կենսակերպից, ասում է՝ համատարած ստուգում կամ «վարակում են» իրար, վստահության դեֆիցիտ կա ամբողջ իրավապահ ու պետական կառավարման համակարգում՝ թմրանյութերի ակտիվ տարածման պատճառով։
« Հիմա մենք ամեն տեղ չենք գնում, ամեն հարսանիքի, կնունքի հրավերի հետևից չենք վազում, հարցեր կան․․․ իսկ եթե անգամ գնում ենք, նկատել եմ՝ տղերքը թույլ չեն տալիս, որ մատուցողը կամ սեղանակիցը բերի բացած օղի լցնի իրենց բաժակները, հատկապես քաշած օղին է շատ վտանգավոր, վախեր կա բան կա․․․ ի՞նչ իմանաս՝ ի՞նչ կարան սարքեն գլխիդ» - իրավիճակն այսպես է նկարագրում մեր զրուցակիցը՝ ընդգծելով, որ Կառավարության բարձր օղակից իրենց կարծիքով կա հրահանգ՝ ստուգել համակարգում աշխատող բոլոր-բոլորին՝ պարզելու թմրանյութերի համատարած օգտագործման մասին տարատեսակ լուրերը։ Իսկ, թե ինչու՞ են սկսել չվստահել նաև սեղանակիցներին, ասում է՝ «Կարա հենց գործընկերդ գլխիդ սարքի ու հաջորդ օրը նավոդկա տա վրեդ, կանչի գան սյուրպրիզ անեն սենյակդ մտնել-անալիզ վերցնելով»։
Այսինքն հիմա կա նաև այդպիսի հրահա՞նգ, հետաքրքրվեցինք մեր զրուցակցից, հաստատեց, որ այո՛, - «Պարբերաբար տհաճ անակնկալ այցերով մտնում են հատկապես իրավապահների մոտ, Քննչականի տղերքն են թիրախում» - ասում է զրուցակիցը։
Նկատենք, մերօրյա պետական կառավարման համակարգում կան և՛ թմրանյութ օգտագործողներ, և՛ տարածողներ, դա արդեն փաստել է ինքը՝ ՆԳ նախկին նախարար Վահե Ղազարյանի վերջին աղմկահարույց ելույթներից մեկը՝ ԱԺ ամբիոնից։
2 ամիս առաջ ՆԳ նախկին նախարարը խոստովանեց իր թուլության մասին՝ Հայաստանում 47 ոստիկան թմրամիջոց օգտագործելու բացահայտված դեպքով հեռացվել է աշխատանքից։ Հիշենք, նաև քննիչների մասին երկու տարի առաջ արված բացահայտումները, ՔԿ քննիչներն ըստ մամուլի՝ իրենք էին դարձել թմրանյութ շրջանառողներ։
