Երևանի Կարեն Դեմիրճյանի անվան մարզահամերգային համալիրում կայացավ Զինվորականների ըմբշամարտի 37-րդ աշխարհի առաջնության բացման պաշտոնական արարողությունը:
Բացման պաշտոնական արարողությանը ներկա էին Հայաստանի Հանրապետության պաշտպանության նախարար Սուրեն Պապիկյանը, ՀՀ ԶՈՒ գլխավոր շտաբի պետ Էդվարդ Ասրյանը, ԿԳՄՍ նախարարի տեղակալ Կարեն Գիլոյանը, Միջազգային ռազմական խորհրդի մի շարք պաշտոնյաններ: Բացման արարողությունը մեկնարկեց տեսաֆիլմով՝ ներկայացնելով հայկական ըմբշամարտի ձեռքբերումները և հայոց պատմությունը: Այնուհետ մասնակից երկրների մարզիկները դահլիճ դուրս բերեցին իրենց երկրի դրոշները: Ողջույնի խոսքով հանդես եկավ Ռազմական սպորտի միջազգային խորհրդի նախագահ, գնդապետ Ռոլիմ Նիլտոնը՝ հաջողություն մաղթելով մասնակից մարզիկներին:
ՀՀ պաշտպանության նախարար Սուրեն Պապիկյանը բոլոր մարզիկներին մաղթեց մեծ հաջողություններ և հայտարարեց աշխարհի առաջնությունը բացված: «Սպորտը համախմբում է մարդկանց ազնիվ մրցակցության, արդար պայքարի, բարությանը ծառայող ուժի, գեղեցիկ նպատակներին միտված կամքի, համերաշխության, հանդուրժողականության և խաղաղության գաղափարի շուրջ: Եվ պատահական չէ, որ Հայաստանը և նրա մայրաքաղաք Երևանը երբեք չեն հեռանում իրենց մարզական ավանդույթներից»,- ասաց նախարար Պապիկյանը: Զինվորականների ըմբշամարտի 37- րդ աշխարհի առաջնությանը մասնակցում են 24 երկրի ներկայացուցիչներ։ Ընդհանուր առմամբ Հայաստան են ժամանել մոտ 400 մասնակից:
