2018 թվականից ի վեր, Երևանում տեղի ունեցող մեծ միջոցառումների կազմակերպումը, գրեթե միշտ վստահվում է «Ֆակտորի փրոդաքշն» ՍՊԸ-ին և «Սինեմարտ» ՍՊԸ-ին։
Երևանի քաղաքապետարանը, դեռևս միայն ամանորյա զարդարանքի համար որոշել է հատկացնել 549 մլն դրամ։
Euromedia24.com-ի հետ զրույցում Երևանի ավագանու ընդդիմադիր անդամ Պեդրո Զարոկյանը նշեց, որ անցած տարիներին առանց մրցույթի է իրականացվել, իսկ այս անգամ մրցույթով է իրականանալու։
«Մրցույթը կեղծ ձևով են իրականացնում, անցած տարիներին, որ ընկերությունները իրականացրել են, այս անգամ մրցույթին միայն այդ երկու ընկերություններն են մասնակցում»։
Զարոկյանի խոսքով տարօրինակ է, որ քաղաքապետարանը միշտ հրապարակում է մրցույթի առավելագույն գինը։
«Կարող է այլ ընկերություն 20 տոկոս ավելի մատչելի կազմակերպի, սակայն քաղաքապետարանը առավելագույն գինն է հրապարակում, նույնը արվել է ծառերի գնման ժամանակ, ինչ Ավինյանը եկել է իշխանության, միշտ քիչ մասնակցիներ են մասնակցում մրցույթներին»,-հավելեց մեր զրուցակիցը։
Պեդրո Զարոկյանը նշեց, որ, ամենայն հավանականությամբ, կավելացվի ևս 600 մլն դրամ։
«Անցած տարիների առանց մրցույթի ամանորյա և այլ միջոցառումների դեկորացիաների դեմ բողոքելուց հետո, այս տարի քաղաքապետարանը որոշել է «տենդեր» անել: Բայց ակնհայտորեն նույն երկու ընկերությունները, ինչ նախկինում էին՝ «Ֆակտորի փրոդաքշն» և «Սինեմարտ» ՍՊԸ-ներն են մասնակցում, որոնք հաղթել են անհեթեթ թանկ գներով մրցույթը` չմրցելով միմյանց հետ զարդերի տեսակի վերաբերյալ, որպեսզի երկուսն էլ կարողանան առաջարկել առավելագույն թույլատրելի գումարը և շահել:
Սա ակնհայտորեն կոռուպցիոն սխեմա է, որը վատնում է հարկատուների փողերը և խոչընդոտում ազնիվ ընկերություններին մրցակցել քաղաքային և պետական միջոցառումների հայտերում մրցունակ գներ առաջարկելու համար», - նշեց Զարոկյանը։
