Ուկրաինայի նախագահ Վլադիմիր Զելենսկին հայտարարել է, որ երկիրը պատրաստ է նախագահական ընտրություններ անցկացնել, եթե Ռուսաստանի նախագահ Վլադիմիր Պուտինը համաձայնի 60-օրյա լիակատար հրադադարի։ Այս մասին հայտնում է ուկրաինական «Страна» պարբերականը։
ABC News-ին տված հարցազրույցում Զելենսկին անդրադարձել է ԱՄՆ նախագահ Դոնալդ Թրամփի՝ Ուկրաինայում նոր առաջնորդ ընտրելու կոչին՝ ընդգծելով, որ երկրի ղեկավարին ընտրելու իրավունքը պատկանում է բացառապես Ուկրաինայի քաղաքացիներին։
«Նախագահ Թրամփի նկատմամբ ամբողջ հարգանքով հանդերձ՝ դա պետք է որոշի մեր հասարակությունը, մեր ժողովուրդը՝ ընտրելով այս կամ այն առաջնորդին», — հայտարարել է Զելենսկին։
Ուկրաինայի նախագահի խոսքով՝ ինքը Թրամփի վարչակազմի ներկայացուցիչներին բացատրել է, որ պատերազմի պայմաններում ընտրություններ կազմակերպելու համար անհրաժեշտ է առնվազն երկու ամսով դադարեցնել ռազմական գործողությունները։
«Եթե դուք իսկապես ցանկանում եք, որ Ուկրաինան ընտրություններ անցկացնի, խնդրում եմ, ասեք Պուտինին՝ մեզ տվեք երկու ամիս՝ 60 օր լիակատար հրադադար, և մենք կկազմակերպենք ընտրությունները», — ասել է Զելենսկին։
Նա ընդգծել է, որ հրադադարն անհրաժեշտ է ընտրական գործընթացը կազմակերպելու և քվեարկության անվտանգությունն ապահովելու համար։
Զելենսկու հայտարարությունը հաջորդել է հոկտեմբերի 10-ին Սպիտակ տանը Դոնալդ Թրամփի արած հայտարարություններին։
ԱՄՆ նախագահը լրագրողների հետ զրույցում Ուկրաինային կոչ էր արել ընտրել նոր առաջնորդ՝ պնդելով, որ Զելենսկին բաց է թողել պատերազմն ավարտելու մի շարք հնարավորություններ։
«Ես նրանց առաջարկում եմ գտնել նոր առաջնորդ, որը կկարողանա գործարք կնքել, որովհետև նա կարող էր բազմաթիվ գործարքներ կնքել, բայց ինչ-ինչ պատճառներով երբեք դա չի անում», — հայտարարել էր Թրամփը։
Ամերիկայի նախագահը նաև քննադատել էր ռուսաստանյան նավթավերամշակման գործարաններին Ուկրաինայի հասցրած հարվածները՝ դրանք կապելով ԱՄՆ-ում դիզելային վառելիքի գների բարձրացման հետ։
Այսպիսով, Զելենսկին նախագահական ընտրությունների անցկացման հնարավորությունը պայմանավորում է Ռուսաստանի կողմից 60-օրյա լիակատար հրադադարի հաստատմամբ։
