Թբիլիսիում ձերբակալել են Դավիթ և Գեորգի Պեյքրիշվիլի եղբայրներին, որոնց Վրաստանի իրավապահ մարմինները կապում են քրեական շրջանակների հետ։ Եղբայրները ձերբակալվել են անցած գիշեր՝ խմբակային բռնության և շորթման կասկածանքով, հայտնում է Georgia Online-ը։
Վրաստանի ՆԳՆ տվյալներով՝ ըստ քննչական վարկածի, Գեորգի Պեյքրիշվիլին Թբիլիսիում գտնվող բնակելի տուն է տարել քաղաքացիներից մեկին և նրանից պահանջել խոշոր գումար՝ այսպես կոչված քրեական հովանավորչության համար՝ հրաժարվելու դեպքում սպառնալով սպանությամբ։
Մեկ այլ քրեական գործի շրջանակում, ինչպես պնդում է քննությունը, Դավիթ Պեյքրիշվիլին իր անձնական թիկնապահի հետ միասին, կոնֆլիկտից հետո, ծեծի է ենթարկել մի երիտասարդի։ Երկու եղբայրներն էլ ձերբակալվել են օպերատիվ և քննչական միջոցառումների ընթացքում։ Նրանց հետ միասին ոստիկանությունը ձերբակալել է ևս մեկ անձի։ Քննությունը կատարվում է Վրաստանի քրեական օրենսգրքի շորթման և խմբակային բռնության մասին հոդվածներով։
Վրացական ԶԼՄ-ների տվյալներով՝ հատուկ գործողությունն անցկացվել է գիշերը՝ մոտ 3-ին։ Եղբայրներից մեկին ձերբակալել են հյուրանոցում, մյուսին՝ բնակելի տանը։
Դավիթ և Գեորգի Պեյքրիշվիլի եղբայրների անունները երկար տարիներ հիշատակվել են Վրաստանում քրեական գործերի մասին հաղորդագրություններում։ 2020 թվականին նրանք իրենք էլ անցնում էին որպես պատվիրված սպանության նախապատրաստման ենթադրյալ զոհեր․ գործով ձերբակալվել էր վեց մարդ, որոնց մեղադրանք էր առաջադրվել եղբայրների դեմ մահափորձ նախապատրաստելու համար։
Ավելի վաղ եղբայրները հիշատակվել էին նաև այլ քրեական պատմություններում։ Մասնավորապես, Դավիթ Պեյքրիշվիլիի անունը կապում էին Թբիլիսիի կենտրոնում տեղի ունեցած խոշոր կողոպուտի գործի, ինչպես նաև այսպես կոչված «մազավշչիկների» գործի հետ։ Ընդ որում, այս դրվագների վերաբերյալ տեղեկությունները վերաբերում են նախկին հետաքննություններին և չեն նշանակում, որ եղբայրները նշված գործերից յուրաքանչյուրով ճանաչվել են մեղավոր։
