«Ժողովուրդ» օրաթերթը գրում է. ««Ժողովուրդ» օրաթերթի տեղեկություններով՝ սեպտեմբերի 27-ին Կոտայքի մարզի Արզնի համայնքում ևս ՏԻՄ ընտրություններ են սպասվում։
Այս ընտրությունը հատկապես ուշագրավ է, քանի որ Արզնիում ընտրությունը չի անցկացվելու համամասնական կարգով․ համայնքը, ունենալով 4000-ից պակաս ընտրող, մասնակցում է մեծամասնական ընտրակարգով, իսկ ավագանին կազմված է լինելու 9 անդամից։ Այս տարվա նախնական տվյալներով՝ Արզնիում ընտրելու իրավունք ունի 2344 քաղաքացի։
Հիշեցնենք, որ Արզնիի ղեկավարը՝ Ֆելիքս Միրզոևն է։Միրզոևը համայնքի ղեկավար դարձավ 2023 թվականի ընտրությունների արդյունքում։ Այդ ընտրություններում նա ստացել էր 372 ձայն՝ առաջ անցնելով «Քաղաքացիական պայմանագիր» կուսակցության առաջադրած Ալեքսանդր Միրզոևից, որը ստացել էր 292 ձայն։ Մյուս թեկնածուներից Վարդան Ավագյանը ստացել էր 236, Էմիլ Իվանովը՝ 113, իսկ Կորյուն Չոբանյանը՝ 103 ձայն։ Ընտրողների ընդհանուր թիվը այդ ժամանակ 2132 էր, մասնակցությունը՝ 1164։
Այս թվերն Արզնիի քաղաքական իրականության մասին շատ բան են ասում․ ՔՊ-ի թեկնածուի առկայությունը դեռևս չի նշանակում, որ համայնքում իշխանության թեկնածուն ինքնաբերաբար հաղթելու է։ՔՊ-ն Արզնիում պարտվել էր2023 թվականի ընտրություններում իշխանական կուսակցությունը բացահայտ մտել էր պայքարի մեջ․ ՔՊ-ն համայնքի ղեկավարի թեկնածու էր առաջադրել Ալեքսանդր Միրզոևին։ Սակայն հաղթեց ինքնառաջադրված Ֆելիքս Միրզոևը։ Սա կարևոր նախադեպ է նաև 2026 թվականի ընտրությունների համար։Որքան էլ Արզնին փոքր համայնք է, այստեղ ընտրությունների արդյունքը կարող է ցույց տալ՝ ՔՊ-ն որքանով է կարողանում իր քաղաքական ազդեցությունը տարածել ոչ միայն խոշոր քաղաքներում, այլև փոքր, տեղային քաղաքական համակարգերում։Այս անգամ ընտրական գործընթացը տեղի է ունենում այլ քաղաքական միջավայրում։
Հունիսի խորհրդարանական ընտրություններից հետո իշխանությունը մտել է ՏԻՄ ընտրությունների փուլ, որտեղ յուրաքանչյուր համայնք դիտարկվում է նաև որպես տեղական իշխանության կառավարման արդյունավետության և քաղաքական վերահսկողության ցուցիչ։Արզնիի պարագայում հատկապես հետաքրքիր է այն, որ գործող համայնքապետը կուսակցական իշխանության թեկնածուով հաղթած ղեկավար չէ։ Նա ունի սեփական ընտրական պատմությունը և սեփական տեղական հենարանը։Ու հենց այստեղ է առաջանում գլխավոր հարցը՝ արդյո՞ք իշխանությունը կփորձի Արզնիում ձևավորել այնպիսի ավագանի, որը առավել կառավարելի կլինի կենտրոնական իշխանության համար։ Մեր աղբյուրները փոխանցում են, որ վերջինս «հարմար» թեկնածու է իշխանությունների համար, ու հենց նրա վերարտադրությունը ևս կլինի իշխանությունների սրտով։Արզնին Կոտայքի մարզի սովորական բնակավայրերից չէ։ Համայնքը Երևանին մոտ է, ունի առողջարանային և տնտեսական ներուժ, իսկ համայնքի տարածքում գործում են զբոսաշրջային և հանգստի ոլորտի օբյեկտներ։
Միաժամանակ այն ունի նաև իր առանձնահատուկ համայնքային և ազգային-մշակութային միջավայրը։Ուստի այստեղ իշխանության համար կարևոր է ոչ միայն ընտրությունների օրը ձայներ հավաքելը։ Կարևոր է տեղական կառավարման համակարգում ազդեցություն ունենալը։Իսկ ավագանին հենց այն մարմինն է, որի միջոցով համայնքում ընդունվում են բազմաթիվ առանցքային որոշումներ՝ համայնքային բյուջեից մինչև գույքային և զարգացման հարցեր։Հետևաբար սեպտեմբերի 27-ի ընտրությունը կարելի է դիտարկել նաև որպես 9 աթոռի համար պայքար, որի հետևում կանգնած է համայնքային իշխանության վերահսկողության հարցը։Գործող համայնքապետի համար իրավիճակը ևս միանշանակ չէ։ Մի կողմից՝ 2023-ի ընտրությունները ցույց տվեցին, որ նա ունի անձնական ընտրական ռեսուրս և կարողացել է հաղթել նույնիսկ ՔՊ-ի առաջադրած թեկնածուին։
Մյուս կողմից՝ նրա պաշտոնավարման ընթացքում եղել են նաև բավական աղմկահարույց դրվագներ։ 2025 թվականի հունիսին Ֆելիքս Միրզոևը ձերբակալվել էր Կոտայքում տեղի ունեցած ծեծկռտուքի և կրակոցների դեպքի շրջանակում։ Քննչական կոմիտեի տվյալներով՝ գործի շրջանակում սկզբում մի քանի անձ էր ձերբակալվել, իսկ Միրզոևը հետագայում ազատ էր արձակվել։Դրան հաջորդած հրապարակումներում նրա անունը հայտնվեց նաև համայնքային գույքի և հրապարակային սակարկությունների վերաբերյալ մեկ այլ քրեական վարույթի համատեքստում։ Այդ հրապարակումները վերաբերում էին նրա կողմից պաշտոնեական ազդեցությունը չարաշահելու վերաբերյալ կասկածներին»։
Մանրամասները՝ «Ժողովուրդ» օրաթերթի այսօրվա համարում։
