Բիշքեկում ավարտվել է ՀՀ վարչապետ Նիկոլ Փաշինյանի և ՌԴ նախագահ Վլադիմիր Պուտինի մոտ 1 ժամ տևած հանդիպման բաց հատվածը։ ԵՄ-ին Հայաստանի անդամակցության գործընթացի և ԵԱՏՄ-ին անդամակցության շուրջ քննարկումից հետո կողմերը պայմանավորվել են զրույցը շարունակել փակ դռների հետևում։
Հանդիպման ընթացքում Փաշինյանն ընդգծել է, որ ԵՄ-ին անդամակցության ուղղությամբ Հայաստանի սկսած գործընթացն ուղղված չէ ո՛չ Ռուսաստանի, ո՛չ էլ ԵԱՏՄ-ի դեմ։
«Այս գործընթացը դեմ չէ ՌԴ-ին, դեմ չէ ԵԱՏՄ-ին։ Մենք բարձր ենք գնահատում ՌԴ-ի հետ մեր հարաբերությունները, այն իսկապես մեզ համար կարևոր է։ Հույս ունենք՝ ՌԴ-ի համար նույնպես։ Եվ մենք պետք է հոգատարությամբ վերաբերվենք այդ հարաբերություններին»,- հայտարարել է Փաշինյանը։
Նա վերահաստատել է, որ անձամբ ինքն ու ՀՀ կառավարությունը հենց այդ մոտեցմամբ են վերաբերվում Ռուսաստանի հետ հարաբերություններին։
Փաշինյանն անդրադարձել է նաև ԵՄ-ին անդամակցության գործընթացի մեկնարկի մասին օրենքին՝ նշելով, որ դրա ընդունմամբ Հայաստանը փաստացի հրաժարվել է այս փուլում ԵՄ անդամակցության վերաբերյալ հանրաքվե անցկացնելու գաղափարից, քանի որ հարցը դեռ հասունացած չէ։
Պուտինն իր հերթին հայտարարել է, որ մեկ այլ կազմակերպությանն անդամակցելու գործընթաց սկսելու մասին օրենքի ընդունումը, իր գնահատմամբ, նշանակում է գործող միությունից դուրս գալու մասին հայտարարություն։ ՌԴ նախագահը նաև նշել է, որ Մոսկվան ցանկանում է հնարավորինս արագ հասկանալ Հայաստանի հետագա ընտրությունը՝ ԵՄ-ի և ԵԱՏՄ-ի համատեքստում։
Փաշինյանը հակադարձել է, որ հայկական կողմն ուսումնասիրել է իրավական բազան և ԵՄ-ին անդամակցության գործընթացում որևէ խախտում չի տեսնում ո՛չ Ռուսաստանի, ո՛չ ԵԱՏՄ-ի նկատմամբ։ Նա շեշտել է, որ Հայաստանը ԵԱՏՄ-ից դուրս գալու մասին չի հայտարարել։
Այսպիսով, ԵՄ-ին անդամակցության գործընթացի և ԵԱՏՄ-ում Հայաստանի անդամակցության իրավական գնահատականների հարցում կողմերի դիրքորոշումները չեն համընկել։ Հանդիպման բաց հատվածն ավարտվել է, իսկ Փաշինյանն ու Պուտինը քննարկումը կշարունակեն փակ դռների հետևում։
