Իրանում սոցիալական համախմբվածությանը վնասող, հոռետեսություն սերմանող կամ պառակտում առաջացնող ցանկացած հայտարարություն, հանրային քննարկում և գործողություն այժմ խստիվ արգելված է: Այս մասին ասվում է Իրանի Իսլամական Հանրապետության գերագույն առաջնորդ այաթոլլահ Մոջթաբա Խամենեիի պաշտոնական ուղերձում։
«Ես կտրականապես հայտարարում եմ՝ արգելվում է սոցիալական համախմբվածությանը վնասող ամեն ինչ: Թուլությունները, թերությունները և առկա խնդիրները ցուցադրություն չեն պահանջում. դրանք պահանջում են պլանավորում և կոնկրետ գործողություններ դրանց լուծման համար»,- ընդգծել է գերագույն առաջնորդը:
Իր ուղերձում պետության ղեկավարը շնորհակալություն է հայտնել գործադիր իշխանությանը և անձամբ նախագահին՝ խիստ պատժամիջոցների, արտաքին ճնշման և ռազմական հակամարտությունից հետո վերակառուցման պայմաններում բնակչությանը հիմնական ապրանքներով և ծառայություններով ապահովելու ջանքերի համար:
Գերագույն առաջնորդը նշել է, որ ներկայիս դժվարին իրավիճակում պետական մարմինների և լրատվամիջոցների հիմնական խնդիրներից մեկը «իրանական ժողովրդի ուժն ու դիմադրողականությունն» օբյեկտիվորեն ցուցադրելն է, այլ ոչ թե արտաքինից պարտադրված «ենթադրյալ կրկնակի հակասությունները» վերարտադրելը:
«Թշնամուն հաճոյանալու համար թուլությունները պետք չէ վեր հանել։ Սխալների անկեղծ խոստովանությունը օգտակար է միայն այն դեպքում, երբ դրանք ուղղված են համաքաղաքացիներին, սակայն թշնամու առջև խնդիրները ընդգծելը խաթարում է ազգի ոգին և կասկածներ է սերմանում», - ասվում է ուղերձում։
