ԱՄՆ նախագահ Ջո Բայդենը պետք է ավելի վաղ հրաժարվեր վերընտրվելու իր ծրագրերից և Դեմոկրատական կուսակցությանը հնարավորություն տար փրայմերիզում նոր թեկնածու ընտրելու։
Այս կարծիքը The New York Times-ին տված հարցազրույցում հայտնել է Ներկայացուցիչների պալատի նախկին խոսնակ Նենսի Փելոսին, ով նոյեմբերի 5-ին կայացած համընդհանուր ընտրություններում վերընտրվել է ԱՄՆ Կոնգրեսի ստորին պալատում։
«Եթե նախագահն ավելի վաղ դուրս գար, այլ թեկնածուներ կարող էին մասնակցել դրան, ենթադրվում էր, որ եթե նախագահը հրաժարվեր վերընտրվել, ապա կանցկացվեին բաց փրայմերիզներ։ Բայց, քանի որ նախագահն անմիջապես աջակցեց փոխնախագահ Քամալա Հարիսին, անհնար կլիներ փրայմերիզ անցկացնել։
Ինչպես նշում է թերթը, Փելոսին այսպիսով հնչեցրել է Դեմոկրատական կուսակցությունում պտտվող խոսակցությունները՝ կապված Բայդենի՝ երկրորդ նախագահական ժամկետը հավակնելուց հրաժարվելու հետ։
Ըստ հրապարակման՝ որոշ ամերիկյան լրատվամիջոցներ հայտնում են, որ Փելոսին կարևոր դեր է խաղացել Բայդենին նախընտրական մրցապայքարից դուրս մղելու գործում։
Փելոսին Կոնգրեսում ծառայում է 1987 թվականից։ 2007 թվականին նա ստանձնել է Ներկայացուցիչների պալատի նախագահի պաշտոնը՝ դառնալով ԱՄՆ-ում այս պաշտոնը զբաղեցրած առաջին կինը։
