Մարոկկոն ուժեղացրել է անվտանգության միջոցներն Իսպանիայի հետ սահմանին՝ սոցիալական ցանցերում իսպանական Սեուտա անկլավի հետ սահմանը նորից զանգվածաբար հատելու փորձի կոչերի ֆոնին, հաղորդում է Associated Press-ը։
Իշխանությունները մտավախություն ունեն, որ կարող են կրկնվել հուլիսի վերջի իրադարձությունները, երբ տասնյակ հազարավոր ներգաղթյալներ փորձեցին հասնել քաղաք։
Մարոկկոյի ՆԳՆ-ն հայտարարել է, որ նոր ապօրինի սահմանահատման փորձը կանխելու համար ձեռնարկվել են «բոլոր անհրաժեշտ միջոցները»։ Գերատեսչությունում ընդգծել են, որ իրավիճակը գտնվում է մշտական վերահսկողության ներքո, հատկապես Սեուտայի և Մելիլյայի սահմանային անցակետերին հարող շրջաններում։
Սոցիալական ցանցերում տարածվում են հաղորդագրություններ՝ շաբաթ օրը սահմանը զանգվածաբար անցնելու նոր փորձ ձեռնարկելու կոչերով։ Այդ կոչերի աղբյուրը դեռ չի հաստատվել։ Տեղական լրատվամիջոցների տվյալներով՝ սահմանի մարոկկոյան կողմում տեղակայվել են հարյուրավոր ոստիկաններ՝ անկարգությունների ճնշման հանդերձանքով, ինչպես նաև ջրցան մեքենաներ և շտապօգնության մեքենաներ։
Մարոկկոյի իշխանությունները հայտնել են մարդկանց մի խմբի ձերբակալության մասին, որոնք կասկածվում են սահմանը զանգվածաբար անցնելու կոչեր տարածելու մեջ։ Այլ մանրամասներ չեն հաղորդվել։
Հուլիսի վերջին մոտ 72 հազար ներգաղթյալ փորձել էր հասնել Սեուտա՝ լողալով կամ հաղթահարելով սահմանային պատնեշը։ Պատճառներից էին նաև համացանցում տարածված կեղծ հաղորդագրությունները, ըստ որոնց սահմանը բաց է։ Հետագայում գրեթե բոլոր ներգաղթյալները վերադարձել են Մարոկկո։ Պաշտոնական տվյալներով՝ անցման փորձի ընթացքում զոհվել է առնվազն 80 մարդ, սակայն իրավապաշտպան կազմակերպությունները ավելի շատ զոհերի մասին են խոսում։
Կոչերն այժմ տարածվում են նաև Մելիլյայի հետ սահմանը հատելու հնարավոր փորձի կապակցությամբ։ Սեուտան և Մելիլյան Եվրամիության՝ Աֆրիկայի հետ միակ ցամաքային սահմաններն են։
Իսպանիան, իր հերթին, զգուշացրել է, որ սահմանը փակ կմնա։ Պաշտպանության նախարար Մարգարիտա Ռոբլեսը Սեուտա այցի ընթացքում հայտարարել է, որ զանգվածային ներթափանցման նոր փորձը չպետք է կրկնվի։
«Բոլորը պետք է հասկանան, որ անհրաժեշտ է դիմակայել նրանց, ովքեր կազմակերպում են այս տեղաշարժերը, դրանց թվում՝ սոցիալական ցանցերի միջոցով։ Սեուտայի կամ Մելիլյայի դեմ ցանկացած ագրեսիա ագրեսիա է ընդհանուր առմամբ Իսպանիայի դեմ»,- հայտարարել է Ռոբլեսը։
Իսպանական Քաղաքացիական գվարդիան իր հերթին սոցիալական ցանցերում ֆրանսերենով և իսպաներենով հայտարարություն է հրապարակել պոտենցիալ ներգաղթյալներին՝ նախազգուշացնելով, որ սահմանը բաց չէ, և սահմանված արգելապատնեշները հատել չի թույլատրվում։
