Ադրբեջանի Միլի Մեջլիսը քննադատել է ԱՄՆ Ներկայացուցիչների պալատի արտաքին հարաբերությունների հանձնաժողովում հուլիսի 22-ին քննարկված H.R. 9087 օրինագծի շրջանակում Ադրբեջանի վերաբերյալ առաջարկված փոփոխությունները։
Մեջլիսի հայտարարության համաձայն՝ այդ նախաձեռնությունները Ադրբեջանի նկատմամբ քաղաքական ճնշում գործադրելու փորձ են և կապվում են հայկական լոբբիստական շրջանակների գործունեության հետ։
Բաքուն պնդում է, որ նման քայլերը կարող են բացասաբար ազդել Հայաստանի և Ադրբեջանի միջև ընթացող խաղաղ գործընթացի վրա։
Ադրբեջանի խորհրդարանը հատկապես անդրադարձել է Ադրբեջանում դատապարտված հայ անձանց վերաբերյալ կիրառվող «ռազմագերի» և «քաղբանտարկյալ» ձևակերպումներին:
Բաքվի հայտարարության համաձայն՝ այդ անձինք պատասխանատվության են ենթարկվել Ադրբեջանի օրենսդրությամբ և միջազգային իրավունքի շրջանակում նախատեսված հանցագործությունների համար։
Միլի Մեջլիսը ԱՄՆ կոնգրեսականներին կոչ է արել հարգել Ադրբեջանի ինքնիշխանությունը և չընդունել որոշումներ, որոնք, ըստ ադրբեջանական կողմի, կարող են խոչընդոտել Հարավային Կովկասում խաղաղության հաստատմանը։
