Համալսարանը չի երկարացրել Միջազգային հարաբերությունների ֆակուլտետի երկարամյա դասախոսներ, քաղաքագիտության դոկտոր, պրոֆեսոր Խաչիկ Գալստյանի և քաղաքագիտության թեկնածու, դոցենտ Ալեն Ղևոնդյանի աշխատանքային պայմանագրերը։
Այս մասին սոցիալական ցանցում հայտնել է Միջազգային հարաբերությունների ֆակուլտետի քաղաքագիտության ամբիոնի դոցենտ Նարեկ Գալստյանը։
«Համալսարանը չի երկարացրել աշխատանքային պայմանագրերը մեր ֆակուլտետի ևս երկու դասախոսի՝ ք․գ․թ․, դոցենտ Ալեն Ղևոնդյանի և ք․գ․դ․, պրոֆեսոր Խաչիկ Գալստյանի հետ։
Խաչիկի նկատմամբ ավելի քան վեց ամիս, իսկ Ալենի նկատմամբ՝ շուրջ մեկ ամիս շարունակվում են դատական գործընթացները։ Սա անսպասելի չէր, սակայն, միևնույն ժամանակ, ցավոտ և հիասթափեցնող որոշում էր։
Ավելի քան 20 տարի այս մարդիկ եղել են մեր ֆակուլտետի դրոշակակիրները՝ վայելելով գործընկերների հարգանքն ու ուսանողների սերը։ Նրանք դա իսկապես վաստակել են։
Պատիվ ունեմ նաև նրանց ընկերը լինելու։
Զորակցությունս իմ և ընտանիքիս վաղեմի ընկերներին։ Արդարությունը վերականգնվելու է»,- գրել է նա։
