Hyundai ընկերությունը ներկայացրել է Elantra սեդանի նոր սերունդը, որը Հարավային Կորեայի ներքին շուկայում կվաճառվի Avante անվամբ։ Ավտոմեքենան ձեռք է բերել ամբողջությամբ վերամշակված դիզայն՝ կատարված Art of Steel («Պողպատի արվեստը») նոր կորպորատիվ ոճով, որի առանձնահատկությունն են թափքի սուր գծերն ու արտահայտիչ երկրաչափական ձևերը, գրել է Autocar-ը։
Նոր Elantra-ն մի փոքր ավելի մեծ է դարձել իր նախորդից։ Անիվների բազան ավելացել է 30 միլիմետրով, ինչի շնորհիվ սեդանը փոքր-ինչ մեծ է իր մրցակից Skoda Octavia-ից։ Ավտոմեքենան նաև լայնացել է 30 միլիմետրոով, հատուկ ուշադրություն է դարձվել սրահի տարածքի մեծացմանը։
Ինտերիերը ստեղծված է հարմարավետության շեշտադրմամբ։ Առջևի վահանակն ու դռների քարտերը կարծես «պարուրում» են վարորդին և ուղևորին, իսկ կարգավորվող LED լուսավորությունը թույլ է տալիս փոխել սրահի մթնոլորտը։
Ինչպես վերջերս ներկայացված Ioniq 3 հեչբեկի դեպքում, թվային գործիքակալի վահանակը տեղադրված է առջևի վահանակի վերին հատվածում, որպեսզի վարորդը կարողանա կարդալ տեղեկատվությունը՝ չշեղվելով ճանապարհից։
Կենտրոնական տեղը զբաղեցնում է 12,9 կամ 14,6 դյույմանոց մուլտիմեդիա էկրանը։ Այն աշխատում է Pleos նոր օպերացիոն համակարգով, որը թույլ է տալիս նավիգացիոն և երաժշտական հավելվածներ տեղադրել անմիջապես ավտոմեքենայի մուլտիմեդիա համակարգում՝ առանց սմարթֆոնի էկրանի հայելային արտապատկերման անհրաժեշտության։ Էկրանի տակ պահպանվել է կլիմատ-կոնտրոլի ֆիզիկական կոճակների և կարգավորիչների առանձին բլոկը։
Հարավկորեական շուկայում մոդելը կառաջարկվի երկու ուժային համակարգով՝ 2,0 լիտրանոց բենզինային չորս մխոցանի շարժիչով, որն ունի 147 ձիաուժ, և 1,6 լիտրանոց հիբրիդային համակարգով, որը զարգացնում է 155 ձիաուժ։
Հիբրիդային տարբերակն ունի նոր խելացի ռեկուպերատիվ արգելակման համակարգ, որը վերլուծում է առջևի ճանապարհը և ավտոմատ կերպով կարգավորում ռեկուպերացիայի ինտենսիվությունը՝ օգնելով ավելի արդյունավետ լիցքավորել մարտկոցը։
Մյուս առանձնահատկություններից մեկը Stay Mode ռեժիմն է, որը թույլ է տալիս կայանման ընթացքում օգտագործել քարշիչ մարտկոցի էներգիան՝ կլիմատ-կոնտրոլի և մուլտիմեդիա համակարգի սնուցման համար, էլեկտրական մեքենաների նմանությամբ։
Նոր Elantra-ի վաճառքը Հարավային Կորեայում կսկսվի արդեն առաջիկա շաբաթներին։ Hyundai-ն դեռ չի հաստատել՝ արդյոք մոդելը կհայտնվի Եվրոպայի և Մեծ Բրիտանիայի շուկաներում։ Նախորդ սերունդը պաշտոնապես այնտեղ չէր վաճառվում, թեև փորձարկումներ էր անցնում։ Autocar-ի տեղեկություններով՝ ընկերությունը դեռ չի բացառում նոր մոդելը եվրոպական շուկա դուրս բերելու հնարավորությունը։
Բաց է մնում նաև Elantra N սպորտային տարբերակի թողարկման և դրա հնարավոր հայտնվելու հարցը Եվրոպայում։
