Ուկրաինայի նախագահ Վլադիմիր Զելենսկին հայտնել է, որ Լեհաստանի նախագահին է վերադարձրել Սպիտակ Արծվի շքանշանը՝ երկրի բարձրագույն պետական պարգևը, որին արժանացել էր 2023 թվականին։
Համապատասխան հայտարարությունը Զելենսկին հրապարակել է X սոցիալական ցանցում՝ նրան այդ պարգևից զրկելու մասին լեհական իշխանությունների որոշման ֆոնին։ Ուկրաինայի առաջնորդն ընդգծել է, որ շքանշանի հանձնումն ընկալել էր որպես ռուսական ագրեսիային դիմակայության գործում ողջ ուկրաինական ժողովրդի և բանակի վաստակի ճանաչման նշան։
«Մենք կարծում էինք, որ 2023 թվականին Սպիտակ Արծվի շքանշանը տրվել էր հենց ուկրաինական ժողովրդին և մեր բանակին։ Հենց այդպես էլ այն ժամանակ ասվում էր։ Այսօր ես այդ շքանշանը հետ ուղարկեցի Լեհաստանի նախագահին», — գրել է Զելենսկին։
Միաժամանակ, Ուկրաինայի նախագահը շնորհակալություն է հայտնել լեհ ժողովրդին աջակցության համար և հայտնել, որ Կիևը մնում է բաց Վարշավայի հետ համագործակցության համար՝ չնայած պատմական հարցերի շուրջ տարաձայնություններին։ Նրա խոսքով՝ Ուկրաինան կշարունակի աշխատել Լեհաստանի հետ գործընկերային հարաբերությունների պահպանման ուղղությամբ և կձգտի ընդհանուր պատմության բարդ էջերի շուրջ հարգալից երկխոսության։
Զելենսկին նաև վստահություն է հայտնել, որ «ապագան կհաստատի հարգանքը ուկրաինացիների հանդեպ», և նշել է, որ Ուկրաինան կշարունակի պայքարն արդար խաղաղության և Եվրոպայում անվտանգության համար։
