Միջոցառման շրջանակում ելույթով հանդես է եկել ՀՀ վարչապետի աշխատակազմի ղեկավար Արայիկ Հարությունյանը՝ ողջունելով ներկաներին և շնորհավորելով ուսումնական տարվա հաջող ավարտի առիթով։
Արայիկ Հարությունյանն ընդգծել է, որ դպրոցը կարևոր առաքելություն ունի Հայաստանի կրթական համակարգում։ Նրա խոսքով՝ տեխնոլոգիական ուղղությունը, որը դպրոցի գործունեության հիմքում է, առանցքային նշանակություն ունի նաև Հայաստանի տնտեսության զարգացման համար։
«Հայաստանը մեծ ուշադրություն է դարձնում տեխնոլոգիական զարգացմանը, և մեզ անհրաժեշտ են բարձր որակավորում ունեցող մասնագետներ, որպեսզի մեր երեխաները, դառնալով մասնագետներ, կարողանան սպասարկել և առաջ մղել այդ օրակարգը», – նշել է նա։
Արայիկ Հարությունյանը կարևորել է նաև դպրոցի դերը լավ քաղաքացիներ ձևավորելու գործում՝ հիշատակելով Պոլիտեխնիկի բովանդակային թեզերից մեկը՝ «Ես իմ կտոր երկինքն եմ պահում» կարգախոսը։ Նրա գնահատմամբ՝ կարևոր է, որ սովորողները դաստիարակվեն հենց այս արժեքներով և պատասխանատվության զգացումով։
Նա ուրախությամբ արձանագրել է, որ այսօր պոլիտեխնիկը մեծ ուշադրություն է դարձնում այդ առաքելությանը, իսկ 204 աշակերտներ տոնում են հերթական ուսումնական տարվա հաջող ավարտը։
Ամփոփելով խոսքը՝ Արայիկ Հարությունյանը վստահություն է հայտնել, որ Հոգաբարձուների խորհրդի, համալսարանի և դպրոցի ղեկավարության համատեղ ջանքերով առաջիկա տարիներին դպրոցի կրթական մակարդակն ու հնարավորությունները շարունակաբար կբարելավվեն։
