Շաբաթ օրը՝ մայիսի 23-ին, ՔՊ առաջնորդ Փաշինյանի հետ հանդիպումն՝ Ավան վարչական շրջանում, կազմակերպել է գործարար Արմեն Երեմյանը, մարդ, ով եղել է ՀՀԿ-ական նախկին քաղաքապետ Տարոն Մարգարյանի մտերիմ ընկերն, ընտանիքի բարեկամը և այսօր էլ, պնդում են՝ վատ չեն հարաբերությունները գործող և երբենի ՀՀԿ-ականների միջև։
Երեմյանն, ըստ մեր աղբյուրի, բերել է իր ֆիրմաներում աշխատող տղամարդկանց մեծ խումբ, ովքեր, սակայն քարոզարշավի կեսից լքել են տարածքն՝ առանց ՀՀԿ-ական կուրատորին ասելու։ Ավելին, ՔՊ-ի հանրահավաքի մասնակիցների առաջին շարքերում հպարտ կանգնած էր ՀՀԿ-ական գործարար Երեմյանի մայրը` տիկին Մարուսյան և մեծ ուշադրությամբ լսում էր Փաշինյանի քարոզչությունը։ Հանրահավաքը դեռ չսկսած՝ ուղիղ եթերից նկատելի էր, թե ինչպես են խմբերով մարդիկ բերվում Ավանի՝ Ընտանեկան այգու տարածք, որտեղ նախատեվում էր Փաշինյանի քարոզարշավի կանգառ-հանդիպումն՝ իր պոտենցյալ ընտրողների հետ։
Մարդիկ էին բերվում նաև Ավանի համայնքապետի կողմից՝ մանկապարտեզների կոլեկտիվներ, պոլիկլինիկայի աշխատակիցներ։ Մինչև Նիկոլ Փաշինյանը կժամաներ հանդիպման վայր՝ հավաքի մասնակիցները բանավիճում էին ՝մեկը մյուսին մեղադրելով, թե բա «դու տեղաբնակ չես, ես եմ ավանցի», միամիտ նիկլոասերները չէին էլ նկատել, թե ինչքան մարդ էր իջնում քիչ հեռվում կայանած սրտիկներով կահավորած մեքենաներից։
Իրականում՝ Ավանում Փաշինյանին ծափահարողների մեջ քիչ էին իրական ավան-առինջեցիները։ Ընդգծենք նաև, որ Euromedia 24TV-ի հավաստի տեղեկություններով` նախընտրական թեժ թոհուբոհի մեջ, Ավան վարչական շրջանում, մասնավորապես Ավան-Առինջում՝ ՔՊ-ի համար աշխատում ու ձայներ է հավաքում հենց ինքը՝ նախկին երդվյալ ՀՀԿ-ական, գործարար Արմեն Երեմյանը և նրա եղբայրը՝ Կարեն Երեմյանը, որը հայտնի է «Թիզ» մականվամբ։
Նշենք, որ «Թիզը» երգչուհի Բրյունետի հայրն է։ Այդ օրվա հանրահավաքին լրագրող Սյուզի Բադոյանն իր կադրերում ֆիքսել էր Բրյունետի ամուսնուն՝ «ԱԿՈՒՄԲ 12» ռեստորան-երաժշտական ակումբի սեփականատիրոջ տղային՝ Նարեկ Մանուկյանին։ Նիկոլ Փաշինյանի շոու-հանրահավաքի ժամանակ հավաքվածների շարքերում նկատվում էին նաև Ավան-Առինջի համատիրության և թաղապետարանի աշխատակիցները, որոնց լուսանկարները ներկայացնում ենք ստորև։
