ԱՄՆ նախագահ Դոնալդ Թրամփը պնդում է, որ Միացյալ Նահանգները հանձնառու է ամրապնդել իր «ռազմավարական գործընկերությունը» Հայաստանի հետ։
«Իմ վարչակազմը ամրապնդում է մեր ռազմավարական գործընկերությունը՝ զգալի հնարավորություններ ընձեռելով հայ ժողովրդին և խթանելով կայունությունը Հարավային Կովկասի տարածաշրջանում», - ասվում է ամերիկացի առաջնորդի գրավոր հայտարարության մեջ, որը տեղադրվել է Սպիտակ տան կայքում։
Այս փաստաթուղթը տարածվել է Հայոց ցեղասպանության 111-րդ տարելիցի կապակցությամբ։
Հայտարարության մեջ «ցեղասպանություն» բառը չի օգտագործվում։ «Միասին Միացյալ Նահանգները և Հայաստանը կշարունակեն աշխատել ավելի անվտանգ և բարգավաճ աշխարհ կառուցելու ուղղությամբ», - վստահեցրել է ամերիկացի նախագահը։
Նա հիշեցրել է, որ Հայաստանը միացել է վերջերս ստեղծված ԱՄՆ-ի գլխավորած Խաղաղության խորհրդին։ Վաշինգտոնը և Երևանը կաշխատեն միասին՝ «ուժի միջոցով խաղաղության նոր դարաշրջան» ստեղծելու համար, կարծում է նախագահը։
