«Բարսելոնայի» ղեկավարությունը լեհ հարձակվող Ռոբերտ Լևանդովսկիին նոր պահանջներ կներկայացնի՝ կապված աշխատավարձի և թիմում նրա դերի հետ։ Այս մասին հայտնում է Sport.es-ը։
Ակումբում պատրաստվում են բանակցել թիմի փորձառու հարձակվողի հետ։ Նախքան պայմանագրի երկարաձգման հարցը քննարկելը՝ թիմի ղեկավարությունը լեհ ֆուտբոլիստին կտեղեկացնի, որ նոր մրցաշրջանից նա պահեստայինի կարգավիճակ է ունենալու։ Բացի դրանից, հարձակվողը ստիպված կլինի համաձայնել աշխատավարձի 50 տոկոս կրճատմանը, եթե ցանկանում է շարունակել ելույթները կատալոնական ակումբում։ Հնարավոր նոր պայմանագիրը նախատեսված կլինի մեկ տարով։
Օգոստոսին Ռոբերտ Լևանդովսկին կդառնա 38 տարեկան։ Եթե նա չտա պայմանագիրը երկարաձգելու իր համաձայնությունը, ապա ընթացիկ մրցաշրջանի ավարտից հետո կստանա ազատ գործակալի կարգավիճակ։
Այս մրցաշրջանում անցկացրած 37 հանդիպումում լեհ վետերանը դարձել է 16 գոլի հեղինակ։
