Հնդկական արհմիությունները կոչ են արել փետրվարի 12-ին անցկացնել համազգային բողոքի ակցիա՝ ընդդեմ Հնդկաստանի և ԱՄՆ-ի միջև կնքված նոր առևտրային համաձայնագրի։ Այդ մասին հայտնել է Reuters գործակալությունը։
Գործակալության տվյալներով՝ ավելի քան 100 հնդկական ֆերմերական արհմիությունների գործունեությունը համակարգող «Միավորված գյուղացիական ճակատ» (SKM) կազմակերպությունը հայտարարել է, որ համաձայնագիրը թույլ կտա ներմուծել սուբսիդավորվող ամերիկյան գյուղատնտեսական արտադրանք։ Դա կարող է հանգեցնել ներքին գների նվազման և գյուղական բնակչության եկամուտների կրճատման։
SKM-ի հայտարարության համաձայն՝ հնդկա-ամերիկյան նոր «առևտրային կառուցվածքը» փաստացի հավասարազոր է ամերիկյան գյուղատնտեսական տրանսազգային կորպորացիաների առջև լիակատար կապիտուլյացիայի։ «Մենք թույլ չենք տա հնդկական գյուղատնտեսական հատվածի բացումը ամերիկյան ընկերությունների համար», — հայտարարել է կազմակերպության ազգային քարտուղար Պուրուշոտտամ Շարման։ Նա ընդգծել է, որ մաքսատուրքերի նվազեցումը, մասնավորապես՝ չմաքրված սոյայի յուղի համար, որի վրա ներկայումս կիրառվում է 16,5% հարկ, լուրջ վնաս կհասցնի հայրենական յուղատու մշակաբույսերի արտադրողներին։
Ֆերմերական շարժման առաջնորդներից Ռակեշ Տիկաիթի խոսքով՝ ամերիկացի գյուղատնտեսական արտադրողները տիրապետում են մեծ հողատարածքների և ստանում են ավելի բարձր սուբսիդիաներ, մինչդեռ հնդիկ ֆերմերները ստիպված են կրել բերքի կորուստներ նաև թույլ ենթակառուցվածքների և մշակաբույսերի աճեցման ծախսերի աճի պատճառով։
