Բալթիկ ծովում ջրի մակարդակը գտնվում է անսովոր ցածր նշագծի վրա, ինչի հետևանքով Ստոկհոլմի կենտրոնում գտնվող Կաստելհոլմեն կղզու մոտ տեսանելի է դարձել XVII դարի նավի կմախքը։
Ծովային հնագետ և խորտակված նավերի հարցերով փորձագետ Յիմ Հանսսոնի խոսքով՝ իրեն և իր գործընկերներին դեռ չի հաջողվել ամբողջությամբ նույնականացնել խորտակված նավը։ Այն ժամանակին ծառայել է որպես հիմք՝ այժմ արդեն գոյություն չունեցող կամրջի համար։
«Նավը խորտակվել է դիտավորյալ։ Ավելի վաղ գոյություն ուներ վարկած, ըստ որի այն դանիական նավ էր, որը Շվեդիան գրավել էր մարտի ընթացքում, սակայն մենք գրեթե վստահ ենք, որ դա այդպես չէ, քանի որ ենթադրվում է, որ նավը խորտակվել է 1670 թվականին, մինչդեռ կամուրջը կառուցվել է 1640 թվականին», — պատմել է փորձագետը SVT հեռուստաալիքի եթերում։
Բալթիկ ծովում ջրի մակարդակի նվազման պատճառով, որը մոտ 60 սմ-ով ցածր է նորմայից, Ստոկհոլմում ստիպված են եղել չեղարկել կանոնավոր ծովային երթուղիների մի մասը։ Այս անոմալիայի պատճառը բարձր մթնոլորտային ճնշումն է, որը ճնշում է ջրի մակերեսը և միաժամանակ Շվեդիայում պահպանում է ցուրտ եղանակը։ Կարևոր դեր են խաղացել նաև արևելքից փչող քամիները, որոնք մեծ ջրային զանգվածներ են դուրս մղել Բալթիկ ծովից դեպի արևմուտք։ Տեսանյութն՝ այստեղ։
