Եվրամիությունում աջակցում են Ռուսաստանի հետ կարծիքների փոխանակման վերականգնման նախաձեռնություններին՝ Եվրոպայում հնչող այն կոչերի ֆոնին, որոնք պահանջում են ավելի մեծ ջանքեր գործադրել Ուկրաինայի հակամարտության կարգավորման ուղղությամբ, ինչպես նաև հրապարակումների համատեքստում՝ կապված Ֆրանսիայի նախագահ Էմանուել Մակրոնի դիվանագիտական խորհրդական Էմանուել Բոնի՝ Մոսկվա կատարած այցի հետ։ Այդ մասին հայտնում է Politico թերթը՝ հղում կատարելով եվրոպացի դիվանագետի։
Դիվանագետի խոսքով, որը մասնակցել է բրիֆինգներին, Բրյուսելում կա ընդհանուր ընկալում, որ «կոնտեքստը զգալիորեն տարբերվում է 2022 թվականից», և որ այդ նախաձեռնությունները «լավ համաձայնեցված են» եվրոպական մյուս մայրաքաղաքների հետ։
Ինչպես ավելի վաղ հայտարարել էր Մակրոնը, նա մտադիր է հնարավորինս շուտ հեռախոսազրույց ունենալ Ռուսաստանի նախագահ Վլադիմիր Պուտինի հետ։ 2025 թվականի դեկտեմբերին Բրյուսելում կայացած ԵՄ գագաթնաժողովի արդյունքներով Ֆրանսիայի նախագահը նշել էր, որ Եվրոպային ժամանակն է վերականգնելու երկխոսությունը Ռուսաստանի հետ։ Նրա գնահատմամբ՝ Ուկրաինայի շուրջ բանակցությունների ներկայիս ձևաչափը, որի շրջանակում ամերիկյան ներկայացուցիչները Ռուսաստանի հետ քննարկում են կարգավորման պայմանները առանց եվրոպացիների մասնակցության, «օպտիմալ չէ»։
